Մեդիագրագիտության շաբաթվա շրջանակներում Սյունիքի մարզի սահմանամերձ Ծավ գյուղի դպրոցում այսօր 28 աշակերտների և 9 ուսուցիչների մասնակցությամբ տեղի ունեցավ հանդիպում «Մեդիան հանուն կրթության» ՀԿ նախագահ, լրագրող Անուշ Մարտիրոսյանի հետ:

Մեդիայի զարգացման պատմության՝ քարերի վրա մեդիանյութերի տարածումից մինչև արհեստական բանականության դարաշրջանի՝ օրեցօր զարգացող հնարավորությունները, մեդիային վստահել-չվստահելու հարցերը, մեդիայի դերի ու նշանակության կարևորությունը հանդիպման հիմնական թեմաներն էին:

Աշակերտները նախ ներկայացրին իրենց պատկերացումները մեդիայի մասին: Ապա մեդիայի կանոնների վերաբերյալ քննարկում-զրույցից հետո բաժանվեցին 4 խմբի և գրեցին կարճ լուր՝ իրենց գյուղում նախատեսվող կրթահամալիրի կառուցման և գործունեության վերաբերյալ: 4 խմբերի՝ տարբեր մոտեցումներով գրած լուրի մանրամասները քննարկվեցին հավաստիության, շարադրանքի, կառուցվածքի, մատուցման ձևի տեսանկյուններից:

Ծավի դպրոցին փոխանցվեց Մեդիա նախաձեռնությունների կենտրոնի հեղինակած «5 մատի պես ճանաչել մեդիան» ձեռնարկը։ Դպրոցի տնօրեն Հերմինե Աղաջանյանն ասաց, որ այս գիրքն օգտակար է դասղեկական ժամերին մեդիագրագիտության շուրջ քնարկումների համար։

Մեդիագրագիտության շաբաթը միջազգային շարժում է, որ ՅՈՒՆԵՍԿՕ-ի գլխավորությամբ անցկացվում է ամեն տարի աշնանը՝ նպատակ ունենալով ավելի մեծ ուշադրություն հրավիրել մեդիան հասկանալու, վերլուծելու, գրագետ և արդյունավետ օգտագործելու կարևոր խնդիրների վրա։

Հայաստանում մեդիագրագիտության շաբաթն արդեն 7-րդ տարին անցկացնում է Մեդիա նախաձեռնությունների կենտրոնը՝ ՀՀ ԿԳՄՍ նախարարության հետ համագործակցությամբ: