Լեհաստանի կրթության նախարարությունը քննարկում է 1–8-րդ դասարանների աշակերտների բջջային հեռախոսների օգտագործման արգելք սահմանելու հարցը: Այս հայտարարության հեղինակը կրթության նախարար Բարբարա Նովացկան է։ Նա ասել է որ համապատասխան օրենսդրական նախագիծը մշակվում է և ուժի մեջ կմտնի հաջորդ ուսումնական տարում։

Նախարարն ընդգծել է, որ նման որոշման հիմքում ուսուցիչների պնդումներն են՝ բջջային սարքերը աշակերտներին շեղում են։

«Աշակերտները կորցնում են կենտրոնացումը։ Եթե սա այն գործիքն է, որն ուսուցիչներին անհրաժեշտ է, ես սիրով դա կանեմ նրանց համար», — նշել է նախարարը՝ հավելելով, որ բացառություն կլինի այն դեպքերում, երբ ուսուցիչը որոշի, որ հեռախոսը խիստ անհրաժեշտ է ուսումնական գործընթացում։

Հարցին, թե արդյո՞ք կստորագրվի նման օրենք, Նովացկան պատասխանել է. «Վարչապետին չեմ մեջբերի, բայց վատ կլինի, եթե նա չստորագրի երեխաներին պաշտպանող օրենքները»։

Սահմանափակում՝ սոցցանցերում

Նախարարը նաև տեղեկացրել է, որ իշխող ուժը ծրագրում է սահմանափակել անչափահասների հասանելիությունը սոցիալական ցանցերին, և նախնական դրույթներն արդեն պատրաստ են։

«Մենք արդեն նախնական դրույթներ ենք մշակել։ Հուսով եմ՝ այս շաբաթ դրանք կներկայացնենք» – նախարարի խոսքն է մեջբերում լեհական հանրային ռադիոն։

Ըստ Նովացկայի, թվայնացման նախարարությունը աշխատում է այնպիսի լուծումների վրա, որոնք թույլ կտան հարթակներին հաղորդակցվել թվային ինքնության տվյալների հետ և ստուգել՝ արդյո՞ք օգտատերը 15 տարեկանից բարձր է։

«Համոզված ենք, որ հարթակները պետք է պատասխանատվություն կրեն այն բովանդակության համար, որը մատուցում են», — ասել է Նովացկան՝ հավելելով, որ կանոններին չհամապատասխանող հարթակները կկանգնեն «ծախսատար» հետևանքների առջև։