Առնվազն 153 մարդ, այդ թվում՝ երեխաներ, զոհվել են Իրանի հարավում տեղակայված աղջիկների դպրոցին հասցված ենթադրյալ հարվածի հետևանքով։ Հայտնում են Իրանի պաշտոնական աղբյուրները։

Իրանը տեղի ունեցածի համար մեղադրել է Միացյալ Նահանգներին և Իսրայելին։ ԱՄՆ զինված ուժերի Կենտրոնական հրամանատարությունը հայտարարել է, որ ուսումնասիրում է միջադեպի վերաբերյալ հաղորդումները, մինչդեռ Իսրայելի բանակը նշել է, որ «տեղյակ չէ» տվյալ տարածքում Իսրայելի պաշտպանության բանակի իրականացրած գործողությունների մասին։

Աղջիկների դպրոցը Մինաբ քաղաքում էր՝ Իրանի Իսլամական հեղափոխության պահապանների կորպուսի ռազմաբազայի մոտ, որը նախկինում ևս թիրախավորվել է։

Al Jazeera միջազգային լրատվական գործակալությունը հաղորդում է, որ Իրանի արտգործնախարար Աբբաս Արաղչին հրապարակել է հարձակման հետևանքների լուսանկարը՝ հայտարարելով, որ ավերվել է աղջիկների դպրոցը և զոհվել են անմեղ երեխաներ։

Իրանական «Մեհր» լրատվական գործակալությունը հայտնել է, որ Թեհրանից արևելք գտնվող մեկ այլ դպրոցի վրա իրականացված իսրայելական հարձակման հետևանքով զոհվել է առնվազն 2 աշակերտ։