«Նախորդ տարի կրթության ոլորտին ուղղված ծախսերը նախատեսված են եղել 316 մլրդ դրամի չափով: 2025-ի բյուջեում, իհարկե, աճ կա, բայց, այդ աճը բավականաչափ համեստ է նախորդ տարվա համեմատ: Սա էլ է տրամաբանական: Ամեն տարի այդքան խոշոր աճ չէին կարող ապահովել»,- պետբյուջեի վերաբերյալ քննարկումներին ՀԿ-ներին ներգրավելու նպատակով հրավիրված աշխատաժողովի ժամանակ հայտարարեց Տնտեսական զարգացման և հետազոտությունների կենտրոնի գործադիր տնօրեն Կարինե Հարությունյանը:

Ըստ տնտեսագիտական գիտությունների թեկնածուի, «Կրթության ոլորտի 2024 թ. աճը, փաստորեն, կազմել է 59.4 տոկոս: Սա աննախադեպ աճ է: Ոչ մի ոլորտ երբևիցե չի արձանագրել տարեկան բյուջեի 59.4 % աճ, այն էլ ոլորտ, որը առաջին, երկրորդ կամ երրորդ հորիզոնականում է բյուջեի կառուցվածքի իմաստով, իսկ կրթությունը 3-րդ հորիզոնականում է մշտապես, սոցիալական պաշտպանությունից և պաշտպանությունից հետո»:

Կրթության ոլորտի աճի և պետական բյուջեի աճի համեմատականին անդրադառնալով՝ Տնտեսական զարգացման և հետազոտությունների կենտրոնի գործադիր տնօրենը նշեց. «Պետական բյուջեի աճը 25.7 տոկոս է, բայց կրթության բյուջեն աճել է 59.4 տոկոսով: Կրթության ոլորտում նման իրավիճակ քիչ է պատահել»:

2025 թ.-ին ծրագրերի ֆինանսավորման աճը կկազմի 2,6 %: