France 24-ի հաղորդմամբ, 2024 թվականի տեխնոլոգիական նվաճումների մրցանակին արժանացել է դիսլեքսիայի խնդրի լուծման նպատակով հավելված պատրաստած ընկերության ղեկավար Ֆրանսուա Վոնթրոնը՝ որպես երիտասարդ ձեռնարկատեր։ Նա «Փոփփինս» ընկերության գլխավոր տնօրենն ու համահիմնադիրն է։

Ընկերությունը ստեղծել է համակարգչային տեսախաղ, որն, ըստ անկախ կազմակերպության հետազոտությունների, նպաստում է երեխաների գրելու ու կարդալու հմտությունների զարգացմանը, արագությանը։

Ֆրանսիայում դիսլեքսիայի խնդիր ունի 1 մլն 300 հազար երեխա։ Սա 5-15 տարեկան ֆրանսացիների 15 տոկոսն է։

Ֆրանսուա Վոնթրոնը France 24-ի եթերում հավաստիացրել է, որ հավելվածը մշակվել է միջազգային հեղինակավոր բժշկական հետազոտողների համատեղ խորհրդատվությամբ։ Հիմնական շեշտը դրվել է ռիթմի վրա, որն օգնում է կարդալու, խոսելու տեմպի կարգավորմանը։ Հավելվածը վճարովի է, մտնում է առողջապահական ապահովագրության համար նախատեսված ծառայությունների ցանկում։