2026 թվականի հուլիսի 3-ին տեղի ունեցավ Հայկական ժառանգության պահպանության ուղղությամբ գործունեություն իրականացնող կազմակերպությունների ամենամյա ֆորումը, որը կազմակերպել էր «ՍԻՐԷՀ» հիմնադրամը։ Համաժողովը տեղի ունեցավ ԵՊՀ Շառլ Ազնավուրի անվան մշակույթի կենտրոնում, բացվեց Հայաստանում Եվրոպական միության դեսպան Վասիլիս Մարագոսի ողջույնի խոսքով։ Դեսպանը ընդգծեց մշակույթի զարգացման, մշակութային ժառանգության պահպանության վերաբերյալ քննարկումների կարևորությունը։

«ՍԻՐԷՀ» հիմնադրամի ղեկավար, «Europa Nostra» – ի խորհրդի անդամ Գայանե Կազնատին կարևորեց մշակութային ժառանգության պահպանության ուղղությամբ գործադրվող ջանքերը և ոլորտային կազմակերպությունների փոխգործակցությունը։

«Կայթ» մշակութային հանգույցի ղեկավար Կորյուն Դավթյանը ներկայացրեց ուսումնասիրության տվյալներ, ըստ որոնց՝ ՀՀ բնակավայրերի 72%-ը զրկված է մշակութային կրթությունից։ Պատճառը դասավանդողների պակասն է, նաև մշակութային կրթության միջավայրի բացակայությունը։

«Մեդիան հանուն կրթության» ՀԿ ղեկավար Անուշ Մարտիրոսյանը վկայակոչեց Մեդիա նախաձեռնությունների կենտրոնի, ԱՐԷ հիմնադրամի և Ժամանակակից արվեստի ինստիտուտի համատեղ՝ «Արվեստ լսարան. կամրջելով անջրպետը» ծրագրով 2025 թ․ –ի սեպտեմբեր – նոյեմբերին 5 առաջատար ԶԼՄ – ների ուսումնասիրությունը, որով պարզվել էր՝ այդ ընթացքում հրապարակվել է 591 նյութ․ 75 %-ը իրադարձային լուսաբանումներ են եղել, հիմնականում՝ լուրեր (63%), 40 %-ը՝ պաշտոնական տեքստերի վերահրապարակումներ (հիմնականում՝ մամուլի հաղորդագրություններ), սեփական արտադրանքը՝ 21%, իսկ այդ 21 %–ից միայն 6 %-ը՝ մշակութային քաղաքականության վերաբերյալ, իսկ 13%-ը եղել է Ճանաչողական բնույթի։ Ժամանակակից արվեստը, ըստ մասնագիտական ուսումնասիրության, մնում է լուսանցքում։