«Դասավանդի՛ր հանուն Հայաստանի»-ի արձագանքը՝ PISA 2025-ին

Teach For Armenia-ի հիմնադիր և գործադիր տնօրեն Լարիսա Հովհաննիսյանը PISA 2025-ի արդյունքների վերաբերյալ տարածած հաղորդագրության մեջ նշել է, որ դրանք վերջապես տվյալներ են տվել այն խնդրի վերաբերյալ, որի մասին կազմակերպության ուսուցիչները տարիներ շարունակ բարձրաձայնում են։

2013 թվականին հիմնադրված «Դասավանդի՛ր հանուն Հայաստանի»-ի երկամյա ծրագրի մասնակիցները՝ ուսուցիչ-առաջնորդները, հավաքագրվում և վերապատրաստվում են, ապա երկու տարի ամբողջ դրույքով դասավանդում Հայաստանի հանրակրթական դպրոցներում, հատկապես այն համայնքներում, որտեղ կրթական հնարավորություններն ավելի սահմանափակ են։ Կազմակերպության տվյալներով՝ այսօր «Դասավանդի՛ր հանուն Հայաստանի»-ի ցանցում կա շուրջ 500 շրջանավարտ – դեսպան Հայաստանի 10 մարզերում։

Ըստ Լարիսա Հովհաննիսյանի, 60 հազար աշակերտների հետ Հայաստանի պետական դպրոցներում անմիջականորեն աշխատող ուսուցիչները տեսել են երեխաների, որոնք կարողանում են կարդալ նախադասությունը, բայց չեն կարող ասել՝ ինչ է այն նշանակում։ «Մենք դա անվանել ենք այն, ինչ կա՝ ֆունկցիոնալ անգրագիտություն», – իր հաղորդագրության մեջ գրել է Հովհաննիսյանը։

Հայաստանում 15 տարեկանների միայն 19% – ն է PISA 2025-ի շրջանակում ընթերցանության մեջ հասել գրագիտության բազային մակարդակին։ Մաթեմատիկայում և բնագիտությունում այդ ցուցանիշը 28% է։ Հայաստանի՝ PISA-ին առաջին մասնակցության արդյունքները հրապարակվել են անցյալ շաբաթ։

Լարիսա Հովհաննիսյանի խոսքով՝ Teach For Armenia-ն այս խնդրի մասին խոսել է դասարաններում, զեկույցներում և կրթական քաղաքականության վերաբերյալ քննարկումներում, սակայն ամեն անգամ նույն արդար հարցն է հնչել՝ «Ո՞րն է ձեր տվյալը»։

«Հիմա մենք այն ունենք», – գրել է նա։