Կամավոր ատեստավորման թիրախը և հավելյալ ժամկետը

ՀՀ ԿԳՄՍ նախարարությունը տեղեկացնում է, որ հանրակրթական ուսումնական հաստատության ուսուցիչների կամավոր ատեստավորման հայտերի ընդունման ժամկետը երկարաձգվել է մինչև 2026 թվականի հոկտեմբերի 11-ը։

Ի՞նչ կատարողական պատկեր է ապահովվել ուսուցիչների կամավոր ատեստավորման առնչությամբ։

ՀՀ կառավարության 2023 թվականի մարտի 16-ի N 351-Լ որոշմամբ հաստատված՝ «Հայաստանի Հանրապետության կրթության մինչև 2030 թվականի զարգացման պետական ծրագրից» բխող գործողությունների ծրագրով սահմանվել է «Կամավոր ատեստավորման արդյունքում հանրակրթական դպրոցի հավելավճար ստացող ուսուցիչների մասնաբաժինը» ցուցանիշը։ Ըստ այդմ՝ այն պետք է կազմեր 2023 թվականին՝ 16,6 %, 2024 թվականին՝ 31 %, 2026 թվականին՝ 63 %, իսկ 2030 թվականին՝ 80 %։

2026 թվականի հունվարի 22-ի կառավարության նիստում ՀՀ ԿԳՄՍ նախարար Ժաննա Անդրեասյանը հայտարարել էր, որ 9602 ուսուցիչ, կամ ուսուցիչների շուրջ 31 % – ը, արդեն հաջողությամբ հաղթահարել է կամավոր ատեստավորումը․ «Մասնագիտական զարգացումն ու վարձատրության բարձրացումը մեր կայուն ու հետևողական քաղաքականությունն են, որի արդյունքում 9602 ուսուցիչ կամ մեր ուսուցիչների 31 %-ն արդեն իսկ հաջողությամբ հաղթահարել է կամավոր ատեստավորումը և բարձր վարձատրություն է ստանում։ Կամավոր ատեստավորման այս ցուցանիշներին զուգահեռ կարևորում ենք նաև գործընթացի լավարկումը»։

Այսպիսով, վերջին հրապարակված պաշտոնական տվյալով ցուցանիշը կազմում է դեռ 31 %։ Այն 2026 թվականի համար սահմանված 63 % թիրախի 49,2 % – ն է։

Ուշագրավ է, որ ՀՀ ԿԳՄՍ նախարարությունը կամավոր ատեստավորման հայտերի ընդունման ժամկետի երկարաձգման որոշում կայացրել էր նաև 2024 թվականին։ Այդ տարի հայտերի ընդունելությունը հայտարարվել էր մայիսի 21-ից մինչև սեպտեմբերի 1-ը, իսկ օգոստոսի 9 – ին ժամկետը երկարաձգվել էր մինչև սեպտեմբերի 30-ը ներառյալ։

Միաժամանակ, 2026 թվականի 31 % ցուցանիշը դեռ չի կարող համարվել տարվա վերջնական արդյունք, քանի որ այս տարվա կամավոր ատեստավորման հայտերի ընդունումն ավարտվելու է հոկտեմբերի 11-ին, իսկ գործընթացը շարունակվում է։

2030 թվականի համար նախատեսված է, որ կամավոր ատեստավորման արդյունքում հավելավճար ստացող ուսուցիչների մասնաբաժինը հասնի 80 % – ի։ Թե որքանով հնարավոր կլինի հասնել այդ թիրախին, ցույց կտա հետագա ընթացքը։