COP17․ աշակերտների տաղավարը

«Այբ» դպրոցի աշակերտները COP17-ի առիթով Կարեն Դեմիրճյանի անվան մարզահամերգային համալիր այցելած ԿԳՄՍ նախարարին երեկ ներկայացրել են «Գաղափարից՝ կանաչ ազդեցություն․ նախագծային ուսուցումը հանուն բնության և կայուն ապագայի» նախագիծը։

Աշակերտներին խրախուսելով՝ ԿԳՄՍ նախարարը նշել է, որ նրանց կատարած նախագծային աշխատանքները, այսպիսով, ավելի տեսանելի են դառնում ոչ միայն հայ, այլև միջազգային հանրության համար, ինչը աշակերտների համար լավ մոտիվացիա է՝ հանդես գալու նոր նախագծերով:

Նախարար Ժաննա Անդրեասյանը նշել է, որ այս շրջանում, երբ դպրոցական արձակուրդներ են, աշակերտների անելիքները պետք է կենտրոնանան COP17-ի «Կանաչ գոտում» գործող թեմատիկ տաղավարներում ներկայացվող ծրագրերի ուղղությամբ:

Հիշեցնենք՝ օգոստոսի 17–ին հայտնի դարձավ, որ հոկտեմբերի 19-30-ը, Հայաստանում անցկացվելիք COP17-ով պայմանավորված՝ Երևանում միջոցառման մեկ շաբաթվա ընթացքում դասեր չեն կազմակերպվի։ Փոխարենը՝ սեպտեմբերի 15-ից՝ հինգ շաբաթ շարունակ, մայրաքաղաքի դպրոցներն աշխատեցին վեցօրյա ռեժիմով։ Դրա հաշվին աշակերտները հոկտեմբերին ունեն երկշաբաթյա աշնանային արձակուրդ՝ մեկ շաբաթվա փոխարեն: Այս փոփոխությունը չի վերաբերում առաջին դասարան հաճախող երեխաներին, քանի որ նրանց աշնանային արձակուրդն ի սկզբանե նախատեսված է եղել երկու շաբաթով: