Հենրիկ Իգիթյանի անվան գեղագիտության ազգային կենտրոնում շարունակվում է «Այս առավոտ, այն գիշեր» միջազգային հրատարակչական նախագծի շրջանակում ֆրանսահայ նկարիչ, բանաստեղծ և հրատարակիչ, «AIVAZIAN éditions» հրատարակչության հիմնադիր Գևորգ Այվազյանի հեղինակած եռալեզու գրքի հեղինակային փորագրանկարների ցուցադրությունը։ Ցուցահանդեսը բացվել է հուլիսի 9-ից և կշարունակվի մինչև հուիսի 17-ը։

Նախագիծը միավորում է ժամանակակից հայ պոեզիան, կերպարվեստը և գեղարվեստական տպագրությունը։ Այն ստեղծում է համագործակցության հարթակ Հայաստանի, սփյուռքի և միջազգային մշակութային շրջանակների միջև՝ մեկ գրքում և մեկ ցուցադրությամբ համախմբելով տարբեր սերունդների հեղինակների ու արվեստագետների։

Նախագծի շրջանակում նախատեսվում է հուլիսի 18-28-ը կազմակերպել արվեստագետների և պոետների համատեղ աշխատարաններ՝ Օձունում։ Նմանատիպ աշխատարաններ կկազմակերպվեն նաև Ֆրանսիայում՝ Փարիզից դուրս, բնության միջավայրում։

Նախագծի հեղինակը ֆրանսահայ նկարիչ, բանաստեղծ և հրատարակիչ Գևորգ Այվազյանն է՝ «AIVAZIAN éditions» հրատարակչության հիմնադիրը։ Նրա Հայաստան կատարած ստեղծագործական այցերը, կրթական և մշակութային համագործակցությունները հիմք են դարձել այս նախագծի իրականացման համար։

«Այս առավոտ, այն գիշեր» գիրքը հրատարակվել է արևելահայերեն, արևմտահայերեն և ֆրանսերեն։ Այն ներառում է Հայաստանի և սփյուռքի 14 ժամանակակից հեղինակների ստեղծագործությունները՝ Նշան Աբասյանի, Անի Ասատրյանի, Ծովիկ Կարապետյանի, Րաֆֆի Ավետիսյանի, Սյուզան Խարտալյանի, Թամար Մարի Բոյաջյանի, Հասմիկ Սիմոնյանի, Մարալ Աքթոքմաքյանի, Ավագ Եփրեմյանի, Մհեր Արշակյանի, Անուշ Քոչարյանի, Մերի Մկրտչյանի և Մարուշ Երեմյանի։ Ժողովածուի կազմողներն ու խմբագիրներն են Գևորգ Այվազյանը, Քնարիկ Ներսիսյանը, Հայկ Համբարձումյանը և Թամար Մարի Բոյաջյանը։

Գրքի գաղափարական առանցքը ձևավորում են Ամելի Ադամոյի «Հայաստան» ստեղծագործությունը և Գևորգ Այվազյանի «Երեք շրջան» տեքստը, որոնք առաջարկում են գիրքը կարդալ ոչ միայն որպես պոեզիայի ժողովածու, այլ որպես հիշողության, ժամանակի, ներկայության և ինքնության շուրջ մտորումների տարածք։

Գրքում ներկայացված են նաև 13 ժամանակակից արվեստագետների՝ Հարութի, Ֆլորենս Օբրեքթի, Վահան Սողոմոնյանի, Աքսել Փահլավի, Անի Քանանյանի, Պիեռ Աղաքյանի, Ալեքսանդր Ավագյանի, Անուշ Ղուկասյանի, Մայիդա Չավակի, Գիոմ Թումանյանի, Արման Վահանյանի, Թալին Զաբունյանի և Տիգրան Սահակյանի հեղինակային փորագրանկարները։ Դրանք ստեղծվել են հատուկ այս հրատարակության համար և սահմանափակ տպաքանակով տպագրվել են Երևանի «Սահակյան» արվեստանոցում՝ ավանդական գեղարվեստական տպագրության տեխնիկաներով։

Գրքի հաջորդ տպաքանակը նախատեսվում է աշնանը՝ Փարիզում։