«Հասարակագիտություն–8» գործով վճիռը հետաձգվել է

ԵՊՀ դասախոս Սերոբ Խաչատրյանի և փաստաբան Արսեն Թավադյանի՝ ՀՀ ԿԳՄՍ նախարարության դեմ ներկայացրած հայցով եզրափակիչ դատական ակտը, որը նախատեսվում էր հրապարակել սեպտեմբերի 29-ին, հետաձգվել է դատավորի որոշմամբ։

Դատարանը սեպտեմբերի 10–ին հայտարարել էր գործի քննության ավարտի մասին և տեղեկացրել, որ վճիռը կհրապարակվի սեպտեմբերի 29–ին՝ դատական համակարգի տեղեկատվական կայքում։ Սակայն, ո՛չ սեպտեմբերի 29–ին, ո՛չ էլ 30–ին չի հրապարակվել վիճռը։ Վճռի հետաձգման վերաբերյալ որոշումը հասանելի է դարձել այսօր՝ հոկտեմբերի 1–ին։

Ըստ դատավոր Վահագն Թորոսյանի որոշման, հայցով եզրափակիչ դատական ակտի հրապարակման ժամկետը երկարաձգվել է 15 աշխատանքային օրով։ Հրապարակման նոր օր է նշանակվել 2026 թվականի նոյեմբերի 2-ը՝ դատական իշխանության պաշտոնական կայքի միջոցով։

Դատարանը հրապարակումը սեպտեմբերի 29-ին կատարելու անհնարինությունը հիմնավորել է իր ծանրաբեռնվածությամբ։ Որոշման համաձայն՝ գործի քննության ավարտից հետո՝ սեպտեմբերի 10-ին, 11-ին, 16-ին, 17-ին, 23-ին և 24-ին դատարանը ամբողջ աշխատանքային օրվա ընթացքում՝ ժամը 09:20-ից մինչև 18:00-ը, իսկ սեպտեմբերի 18-ին և 25-ին՝ ժամը 14:30-ից մինչև 18:00-ը, անցկացրել է նախապես նշանակված դատական նիստեր՝ ընդհանուր 101 նիստ։ Նույն ժամանակահատվածում՝ սեպտեմբերի 18-ին, 22-ին և 28-ին, դատարանը ավարտված քաղաքացիական գործերով հրապարակել է համապատասխանաբար 2, 5 և 5 եզրափակիչ դատական ակտ։

Դատարանը նշել է, որ այս հանգամանքները «կումուլյատիվ կերպով» առաջացրել են ժամանակի ֆիզիկական անբավարարություն՝ տվյալ գործով եզրափակիչ դատական ակտը նախապատրաստելու և սեպտեմբերի 29-ին հրապարակելու համար։

Որոշման մեջ դատարանը նաև նշել է, որ հոկտեմբերի 5-ից 16-ը ներառյալ նախագահող դատավոր Վ. Թորոսյանը գտնվելու է ամենամյա հերթական արձակուրդում և այդ ընթացքում ազատված է պաշտոնական լիազորությունների կատարումից։

«Հասարակագիտություն–8» դասագրքի վերաբերյալ հայցով վճռի հետաձգման վերաբերյալ որոշումն օրինական ուժի մեջ է մտնում կայացման պահից և ենթակա չէ բողոքարկման։