Հայաստանում ատեստավորված ուսուցիչները 3830 -ն են։ Կան ուսուցիչներ, որոնք մի քանի անգամ են մասնակցել ատեստավորմանը և վարձատրվում են իրենց լավագույն արդյունքին համապատասխան: Այս տվյալները www.mediaforedu.am-ին փոխանցեց ՀՀ ԿԳՄՍՆ հանրակրթության վարչության պետ Թամարա Սարգսյանը։

2023 թվականին բոլոր դասարաններում դասավանդող բոլոր ուսուցիչները հնարավորություն են ստացել մասնակցել ատեստավորմանը:

Պաշտոնական տվյալներով, 2021 թվականին հայտ է ներկայացրել 1372 ուսուցիչ, մասնակցել է 996-ը, ատեստավորվել է 644-ը։

2022 թվականին հայտ է ներկայացրել 3883 ուսուցիչ, մասնակցել է 2329-ը, արդյունքում ատեստավորվել է 1553 ուսուցիչ։

2023 թվականին հայտ է ներկայացրած ուսուցիչները 6320-ն են, ատեստավորմանը մասնակցել է 4293-ը, ատեստավորվել` 2976-ը։

Վիճակագրական կոմիտեի տվյալներով, 2022/2023 ուսումնական տարում հանրակրթական դպրոցներում մանկավարժական աշխատողների թիվը 38 285 է։ 78.9%-ը՝ 30206 մարդ, կատարել է միայն ուսուցչական աշխատանք, իսկ 21.1%-ը` 8079 մարդ, վարչական, ուսումնաօժանդակ և այլ աշխատանքներին զուգընթաց զբաղվել է նաև ուսուցչական գործունեությամբ։

Ստացվում է, որ Հայաստանում ատեստավորվել է ուսուցիչների մոտ 10%-ը։