ՀՀ ԿԳՄՍ նախարար Ժաննա Անդրեասյանի նախագահությամբ տեղի է ունեցել ՀՀ կրթության տեսչական մարմնի կառավարման խորհրդի նիստը:

Տեղեկացնում է ՀՀ կրթության տեսչական մարմինը։

Ըստ պաշտոնական տեղեկատվության, քննարկվել է Կրթության տեսչական մարմնի 2023 թվականի տարեկան հաշվետվությունը, 2024-ի Տեսչական մարմնի ստուգման գործընթացում փորձարկվող նոր գործիքակազմը։

Կրթության տեսչական մարմնի ղեկավար Վաղարշակ Մատիկյանն ասել է, որ իրավական համապատասխան կարգավորումների ուժի մեջ մտնելուց հետո Տեսչական մարմնի ստուգումներն առավել ամբողջական պատկեր կապահովեն ուսումնական հաստատությունների գործունեության որակի, մասնավորապես չափորոշիչների կատարման նկատմամբ վերահսկողության առումով։ Մատիկյանն ասել է, որ գնահատման սյունակաշարերի՝ ռուբրիկների կիրառումը ուսումնական հաստատության ռիսկայնության որոշման գործընթացը կդարձնեն առավել խորքային, իսկ ստուգման արդյունքների կապը ոլորտը կարգավորող օրենսդրությամբ սահմանված սկզբունքների հետ հնարավորություն կտա որոշելու ուսումնական հաստատության գործունեության և ոլորտում պետական քաղաքականության համապատասխանության աստիճանը։

Նախարար Ժաննա Անդրեասյանը կարևոր է համարել Կրթության տեսչական մարմնի կողմից նախաձեռնված գործիքակազմի և մեթոդաբանության լավարկման աշխատանքները՝ նշելով, որ դրանք պետք է ամբողջապես ընդգրկեն նախադպրոցական, դպրոցական և մասնագիտական կրթության ոլորտները, քանի որ ընթացող բարեփոխումները նույնպես ներառում են կրթության բոլոր ուղղությունները։