ՀՀ կրթության տեսչական մարմնի 2025 թ․ տարեկան հաշվետվության համաձայն, ՀՀ 40 դպրոցներում իրականացված ստուգումների շրջանակում 6-րդ, 9-րդ և 11-րդ դասարանների 3548 աշակերտների 4.9%-ն է Հայոց լեզվի թելադրությունից ստացել Գերազանց գնահատական, Լավ՝ 18.7%-ը, Բավարար՝ 30.8%-ը, Անբավարար՝ 45.6%-ը:

Մաթեմատիկայի գրավոր աշխատանքին մասնակցած 3469 սովորողներից Գերազանց են գնահատվել 4.2%-ը, Լավ՝ 10%, Բավարար՝ 37%, Անբավարար՝ 48.8%:

Միջին գնահատականը հայոց լեզվի թելադրությունից կազմել է 4.3, մաթեմատիկայի գրավոր աշխատանքից՝ 4 միավոր:

«Ստուգումների ընթացքում տրված գրավոր աշխատանքների և նույն սովորողների տարեկան միջին գնահատականները համադրելի չեն թե՛ «Հայոց լեզու», թե՛ «Մաթեմատիկա» առարկաների դեպքում»,– նշված է տեսչական մարմնի 2025 թ․ տարեկան հաշվետվության մեջ:

Պատկերը՝ 2024 թ․ – ին

2024 թվականին տեսչական մարմինը 46 դպրոցներում էր իրականացրել ստուգումներ 6-րդ, 9-րդ և 11-րդ դասարանների գիտելիքների մակարդակը որոշելու նպատակով։ Հայոց լեզվի թելադրությանը մասնակցած 5163 սովորողներից «Գերազանց» են գնահատվել 285-ը (5.5%), Լավ՝ 1071-ը (20.7%), Բավարար՝ 1306-ը (25.4%), Անբավարար՝ 2501-ը (48.4%):

Մաթեմատիկայի գրավոր աշխատանքին մասնակցած 5098 սովորողներից Գերազանց են գնահատվել 198-ը (3.9%), Լավ՝ 543-ը (10.7%), Բավարար՝ 1940-ը (38%), Անբավարար՝ 2417-ը (47.4%):

2024 թվականին միջին գնահատականը հայոց լեզվի թելադրությունից կազմել է 4.4, մաթեմատիկայի գրավոր աշխատանքից՝ 4.1 միավոր:

«Ստուգումների ընթացքում տրված գրավոր աշխատանքների և նույն սովորողների տարեկան միջին գնահատականները անհամադրելի են թե՛ «Հայոց լեզու», թե՛ «Մաթեմատիկա» առարկաների դեպքում»,– 2024 թ․ տարեկան հաշվետվության մեջ նշել էր ՀՀ կրթության տեսչական մարմինը: