Եվրաստատի՝ 2024 թվականին հավաքված ու ամփոփված տվյալներով՝ ԵՄ-ում 15–34 տարեկանների 14.2%-ը կյանքի ընթացքում գոնե մեկ անգամ դուրս է եկել ֆորմալ կրթությունից կամ ուսումնական նախապատրաստական հաստատությունից։

Ամենաբարձր դադարեցման ցուցանիշները գրանցվել են Նիդերլանդներում (32.2%), Դանիայում (27.1%), Լյուքսեմբուրգում (24.8%) և Էստոնիայում (24.4%)։ Իսկ ամենացածր ցուցանիշները եղել են Ռումինիայում (1.5%), Հունաստանում (2.2%) և Բուլղարիայում (3.5%)։

Կրթության բոլոր մակարդակներում (ցածր, միջին, բարձր) կրթական ծրագիրը չավարտելու ամենատարածված պատճառը այն էր, որ այն չի բավարարել սպասումներին կամ չափազանց բարդ է եղել․ այդպես պատասխանել է ֆորմալ կրթությունը լքած մարդկանց 42.6%-ը։ Հաջորդել են այլ ընտանեկան կամ անձնական պատճառները (18.5%) և աշխատանքի նախընտրությունը (13.8%)։ Ֆինանսական պատճառները որպես հիմնական դադարեցման հանգամանք նշել է մարդկանց ընդամենը 5.3%-ը։

Կրթական ծրագրին առնչվող պատճառները, ըստ պաշտոնական տվյալների, տարբեր են եղել ըստ կրթական մակարդակի․ դրանք կազմել են 28.7% ցածր մակարդակի դեպքում, 35.9%՝ միջին, և 50.2%՝ բարձր կրթական մակարդակի դեպքում։

Միևնույն ժամանակ, հիվանդությամբ կամ հաշմանդամությամբ պայմանավորված դուրս գալու դեպքերը ավելի հաճախ գրանցվել են ցածր կրթական մակարդակ ունեցողների շրջանում (11.1%), համեմատած միջինի (9.8%) և բարձրի (5.6%) հետ։

Այլ ընտանեկան կամ անձնական պատճառներն էլ առավել բնորոշ են եղել ցածր կրթական մակարդակին (24.6%) և նվազել են կրթական մակարդակի բարձրացման հետ՝ 21.8% միջինում և 15.0% բարձրում։ Նույնը վերաբերում է նաև աշխատանքի նախընտրությանը․ 17.7% ցածր մակարդակում, 15.7% միջինում և 11.9% բարձր մակարդակում։

Կրթությունը ֆինանսական պատճառներով դադարեցնելը ավելի տարածված է եղել բարձր կրթական մակարդակում (5.7%), քան միջինում (4.8%)։