PISA 2025. Կիպրոսը քննարկում է ելքերը

Կիպրոսի խորհրդարանի կրթության գլխադասային հանձնաժողովի նախաձեռնությամբ հոկտեմբերի 14–ին քննարկվել են PISA-ի՝ սեպտեմբերի 8-ին հրապարակված արդյունքները։ Տեղեկացնում է Կիպրոսի CNA լրատվական գործակալությունը։

«10 աշակերտից 6 – ը չի հասկանում կարդացածը, և դա սարսափելի է», — հայտարարել է Կիպրոսի խորհրդարանի Կրթության հարցերի հանձնաժողովի նախագահ Խրիսանթոս Սավվիդեսը։

PISA-ի արդյունքներով՝ Կիպրոսի աշակերտների 53 %-ը չունի մաթեմատիկայի տարրական հմտություններ, իսկ բնագիտության գնահատմամբ երկիրը վերջին տեղում է։ Ընթերցանությունից աշակերտների 62 %-ը չի հասնում հիմնական մակարդակին։

Սավվիդեսի խոսքով՝ մաթեմատիկայից խնդիրներ ունեցող աշակերտները Կիպրոսում 20-ից 11-ն են, մինչդեռ Եվրոպայում՝ 20-ից 7-ը։ Բնագիտական առարկաների դեպքում, նրա ներկայացմամբ, դժվարություններ ունի աշակերտների 52,11 %-ը, իսկ Եվրամիությունում՝ 26 %-ը։

Հանձնաժողովի նախագահը նշել է, որ նմանատիպ պատկեր է արձանագրվում նաև Կիպրոսի դպրոցներում անցկացվող ավարտական քննությունների ժամանակ։

Կրթության նախարարության արձագանքը

Կիպրոսի կրթության, սպորտի և երիտասարդության նախարարության միջնակարգ հանրակրթության վարչության պետի ժամանակավոր պաշտոնակատար Գեորգիոս Կուցիդիսը ընդգծել է, որ PISA-ն «ամբողջությամբ չի արտացոլում դպրոցի աշխատանքը»։ Այնուամենայնիվ, արդյունքները հարց են առաջացնում, թե արդյո՞ք երեխաներին բավարար հնարավորություններ տրվում են անհրաժեշտ հմտություններ ստանալու համար։

Կուցիդիսը կարևորել է ուսումնական ծրագրի կրճատումը՝ նոր գիտելիքներն ընկալելու, ընթերցանության ըմբռնումը զարգացնելու, մաթեմատիկայի և բնագիտական առարկաների հմտություններն ամրապնդելու համար ավելի շատ ժամանակ ապահովելու նպատակով։ Պաշտոնակատարն ասել է, որ նախարարությունն ուսումնասիրում է միջազգային փորձը և փորձում է կրթական նյութերի փոխանակում կազմակերպել Հունաստանի հետ։

Եռամյա ծրագիրը

Cyprus Mail –ի փոխանցմամբ, միջնակարգ կրթության համար մշակվում է եռամյա ծրագիր, որի իրականացումը նախատեսվում է սկսել 2027 թվականի հունվարից։ Այն կենտրոնանալու է ընթերցանության ըմբռնման, մաթեմատիկայի և բնագիտական առարկաների վրա՝ օգտագործելով նաև PISA-ի նյութերը։

Պիլոտային ծրագիրը կներդրվի միջնակարգ դպրոցի երկրորդ տարում և գնահատել արդյունքները, ապա նյութերը տարածել երրորդ տարվա աշակերտների շրջանում, իսկ ավագ դպրոցի առաջին տարում բարդացնել առաջադրանքները։

Հետազոտությունների, նորարարության և թվային քաղաքականության նախարարության ներկայացուցիչ Էլեանա Գաբրիելը նշել է, որ կրթության թվային փոխակերպման համար հատկացվել է 14 միլիոն եվրո։

Համալսարանների արձագանքը

Կիպրոսի համալսարանի համեմատական կրթության պրոֆեսոր Լեֆտերիս Կլերիդեսը PISA-ի արդյունքները գնահատել է որպես կրթական համակարգի վիճակի ցուցիչ, որի հիման վրա հնարավոր է մշակել ուսումնառության արդյունքները բարելավելու քաղաքականություններ։ Միաժամանակ նա նշել է, որ գնահատման արդյունքներն անմիջականորեն կրթական քաղաքականության հետ կապելը բավական բարդ է։

Նիկոսիայի համալսարանի դասախոս Ելենա Պապանաստասիուն ընդգծել է, որ քննարկումը չպետք է սահմանափակվի արդյունքների վերլուծությամբ։ Նրա խոսքով՝ անհրաժեշտ է համակարգված գնահատել կրթական համակարգում իրականացվող միջոցառումները։ «Եթե այս տարիների ընթացքում չենք գնահատում՝ ինչն է աշխատում, ինչը՝ ոչ, ապա շարժվում ենք կուրորեն», — ասել է նա։

Ֆրեդերիկի համալսարանի ներկայացուցիչ Նիկլեիա Էտեոկլեուսը նշել է, որ անհրաժեշտ են էական բարելավումներ և համագործակցություն այլ կազմակերպությունների հետ, համալսարանները կարող են աջակցել ուսուցիչների մասնագիտական զարգացմանն ու հմտությունների կատարելագործմանը։

PISA-ին մասնակցության ընկալումը

Միջնակարգ կրթության ուսուցիչների արհմիության նախագահ Պանայոտիս Լիսանդրուն նշել է, որ դասավանդման ժամերի ավելացումը պարտադիր չէ, որ բարելավի ուսումնառության արդյունքները, ինչպես որ ուսումնական ծրագրի կրճատումն ինքնին չի երաշխավորում բարելավում։

Արհմիության փոխնախագահ Կիրիակոս Մաթայուն հայտնել է, որ ուսուցիչները տեղյակ չեն եղել, որ իրենց աշակերտները մասնակցում են նման գնահատումների։ Նրա խոսքով՝ թե՛ աշակերտները, թե՛ ուսուցիչները մասնակցությունը հաճախ ընկալում են որպես պարտականություն, և ոչ ավելին։ Նա առաջարկել է մշակել համապատասխան կրթական նյութեր՝ Հունաստանի օրինակով, որպեսզի աշակերտները պատշաճ պատրաստվեն գնահատմանը։ Նաև կարևորել է ուսուցիչների վերապատրաստումն ու ճիշտ մեթոդաբանության մշակումը։

Նախադպրոցականից մինչև համալսարանական կրթության ոլորտը ներկայացնող POED կազմակերպությունը շեշտել է, որ էական արդյունքներ ապահովելու համար անհրաժեշտ է համապարփակ կրթական քաղաքականություն։

Միջնակարգ կրթության ծնողների համադաշնության ներկայացուցիչը նույնպես մտահոգիչ է համարել PISA-ի արդյունքները, սակայն ընդգծել, որ դրանք չպետք է դառնան կրթական բարեփոխումների միակ չափանիշը։ Որպես քննարկման արժանի օրինակներ նշել է Ֆինլանդիան և Շվեդիան, որտեղ կարևոր տեղ է հատկացվում գիրք կարդալուն։

Կուսակցությունների արձագանքները

Ժողովրդավարական հավաքի (DISY) պատգամավոր Նիկոլետա Կոնստանտինուն նշել է, որ PISA-ի արդյունքները հնարավորություն են տալիս վերանայել կրթության ոլորտում ընդունված որոշումները։ Նրա խոսքով՝ անհրաժեշտ է կրթական համակարգի համապարփակ, երկարաժամկետ և համակարգված վերակառուցում, ինչպես նաև ազգային երկխոսություն՝ շարունակական կրթական քաղաքականություն մշակելու համար՝ անկախ կառավարությունների փոփոխությունից։ Նա կարևորել է չափելի նպատակները, հստակ ժամկետներն ու պետական բյուջեում համապատասխան ֆինանսական պարտավորությունները։

«Եթե կրկին սահմանափակվենք խնդիրը բացահայտելով, ապա դա կրթական քաղաքականություն չէ, այլ պարզապես տպավորությունների կառավարում», — ասել է նա։
AKEL կուսակցության պատգամավոր Խրիստոս Խրիստոֆիդեսը քննադատել է վերջին 15 տարիների կրթական ոլորտում տեղի ունեցողը՝ դժգոհելելով, որ Կիպրոսը միջինից ցածր մակարդակից հասել է վերջին տեղերին։ Նրա համոզմամբ, պատճառը համապարփակ ծրագրի և երեխաների ժամանակակից կարիքներին համապատասխան կրթական պայմաններով ապահովելու բացակայությունն է։ Պատգամավորի խոսքով՝ արագ փոփոխվող աշխարհում ավելի կարևոր են քննադատական մտածողությունը, վերլուծությունը, համադրումը, տեխնոլոգիաների կիրառումը, կարեկցանքը, անձնական զարգացումն ու մշակույթը։ Մինչդեռ ուսումնական ծրագրերը շարունակում են կենտրոնանալ անգիր սովորելու և քննություններին պատրաստվելու վրա։

Խրիստոֆիդեսն առաջարկել է ուսումնասիրել Էստոնիայի և Ֆինլանդիայի փորձը։

ELAM կուսակցության պատգամավոր Պոլիս Անոգիրատիսը Կրթության նախարարությունից պահանջել է մշակել հստակ գործողությունների ծրագիր՝ իրականացման ժամանակացույցով և չափելի արդյունքներով։ Նա կարևորել է ուսուցիչների մասնակցությունն ու նախարարության և Մանկավարժական ինստիտուտի հետ համագործակցությունը։ Նաև առաջարկել է կրթական նյութերը տեղադրել հատուկ թվային հարթակում, իսկ PISA-ին վերաբերող աշխատանքները համակարգված ներառել դպրոցների ծրագրերում, որպեսզի աշակերտները հասկանան գնահատման նպատակը և այն չընկալեն որպես ձևական պարտականություն։

«Ալմա՝ Կիպրոսի քաղաքացիների համար» շարժման նախագահ Օդիսեաս Միխայելիդեսը նշել է, որ միջազգային գնահատումները չպետք է անտեսվեն, քանի որ դրանք հնարավորություն են տալիս համեմատել Կիպրոսի կրթական համակարգը այլ երկրների համակարգերի հետ։ Նա որպես օրինակ հիշատակել է Էստոնիան և Մեծ Բրիտանիան։

Կիպրոսի խորհրդարանական հանձնաժողովը նախատեսում է շարունակել քննարկումները։