Ռիչմոնդի դպրոցների տեխնոլոգիական խափանումը

ԱՄՆ-ի Վիրջինիա նահանգի մայրաքաղաք Ռիչմոնդի հանրային դպրոցներում ինտերնետային կապի խափանումը ստիպում է վերադառնալ ավանդական միջոցներին՝ թղթե գրքերին ու տետրերին։ Տեղական իշխանությունը համագործակցում է երեք տպագրատների հետ։ Ինտերնետային կապի բացակայությունը խաթարել է դասերը և դպրոցների հաղորդակցությունը։ Ուսուցիչներն ու աշակերտները մտահոգված են ինչպես ուսումնական գործընթացի շարունակական խափանումներով, այնպես էլ դպրոցների անվտանգության և անձնական տվյալների հնարավոր արտահոսքի հարցերով։

Կիբերանվտանգության հարցերը ստիպել են հաշվի նստել ժամանակակից իրողությունների հետ։ Չորեքշաբթի օրը աշխատակիցները դպրոցական շրջանի համակարգիչների էկրաններին հայտնաբերել են սպառնալիքներ պարունակող հաղորդագրություններ, որոնցում պնդում է եղել, թե հաքերները գողացել են անձնական տվյալներ։ Իրավապահ մարմինները շարունակում են հետաքննությունը։

Անհասսնելիություն

Ուսուցիչները դժգոհում են, որ չեն կարողանում օգտվել էլեկտրոնային դասագրքերից, պատճենահանման սարքերից և թվային դասապլաններից։ Վերջին կիբերհարձակման հետևանքով չեն աշխատել անվտանգության տեսախցիկներն ու ֆիքսված հեռախոսները, իսկ դպրոցի աշխատակիցները չեն կարողացել զանգել ծնողներին։

Ռիչմոնդի կրթության ասոցիացիայի նախագահ Անդրեա Բրայանտը հայտարարել է, որ հաճախումների գրանցամատյաններին և այլ կարևոր համակարգերին հասանելիության բացակայությունն անհանգստացնում է ուսուցիչներին՝ աշակերտների ու աշխատակիցների անվտանգության տեսանկյունից։

Բուհական ուղու խոչընդոտ

Ավարտական դասարանի աշակերտները փաստի առջև են կանգնել. ինտերնետի բացակայությունը բարդացրել է բուհեր դիմելու գործընթացը։ Ուսուցիչները դժվարանում են երաշխավորագրեր ուղարկել, մինչդեռ դիմումների ներկայացման նոյեմբերի 1-ի վերջնաժամկետը մոտենում է։

Կիբերանվտանգության հարցը

Վիրջինիայի նահանգապետ Սփանբերգերը ուրբաթ օրը հանձնարարել է մշակել նահանգային կիբերանվտանգության ծրագիր, թեև հայտարարության մեջ հանրակրթական դպրոցների մասին ուղիղ չի նշվում։

Ռիչմոնդի հանրային դպրոցները տարածաշրջանի երկրորդ դպրոցական շրջանն են, որտեղ այս տարի կիբերանվտանգության լուրջ միջադեպը խաթարել է աշխատանքը։ Մարտին Հանովերի շրջանի դպրոցները նույնպես դադարեցրել էին ինտերնետային հասանելիությունը նմանատիպ միջադեպից հետո։ Հետաքննության արդյունքում այն կապվել էր փրկագին պահանջող վնասաբեր ծրագրի կիրառման փորձի հետ։