Լուսանկարը՝ ՀՀ ԿԳՄՍ նախարարության
ԿԳՄՍ նախարարի տեղակալ Արթուր Մարտիրոսյանն այսօր Եվրոպայի խորհրդի գրասենյակի ներկայացուցիչների հետ հանդիպմանը քննարկել է «Հայ երեխաների իրավունքների պաշտպանությունը հետպատերազմյան համատեքստում» ԵԽ ծրագրի մանրամասները: Տեղեկացնում է ԿԳՄՍ նախարարությունը։
Արթուր Մարտիրոսյանը ներկայացրել է ՀՀ կառավարության կողմից իրականացվող աջակցության ծրագրերը՝ միտված ԼՂ-ից բռնի տեղահանված անձանց հիմնարար իրավունքների, մասնավորապես՝ կրթության իրավունքի իրացմանը:
Փոխնախարարի խոսքով՝ ԼՂ-ից բռնի տեղահանված ավելի քան 17 հազար սովորող ընդգրկվել է ՀՀ հանրակրթական դպրոցներում, ապահովվել է ավելի քան 900 ուսանողի կրթության շարունակականությունն ուսումնարաններում և քոլեջներում, ևս 1834 ուսանողի՝ բուհերում, որոնց տրամադրվել է ուսման վարձի փոխհատուցում:
Եվրոպայի խորհրդի գլխավոր տնօրինության երեխաների իրավունքների հարցերով համագործակցության և կարողությունների զարգացման ստորաբաժանման ղեկավար Զարուհի Գասպարյանը տեղեկացրել է՝ ծրագրով նախատեսվում է իրականացնել երեխաներին սոցիալ-հոգեբանական աջակցություն տրամադրող մասնագետների վերապատրաստումներ ու ստեղծել կարողությունների զարգացման ձեռնարկ՝ նախատեսված թե՛ ուսուցիչների, թե՛ սոցիալական աշխատողների համար։
Նոր մեկնաբանություն