Նյու Յորքի դպրոցներում ԱԲ սահմանափակումը

Նյու Յորքի հանրակրթական դպրոցներում գեներատիվ արհեստական բանականության կիրառման սահմանափակման որոշումը դարձել է լայնածավալ քննարկումների առիթ։

2026–2027 ուսումնական տարում տեխնոլոգիայի օգտագործման մեկամյա արգելքը վերաբերում է նախադպրոցական ծրագրերից մինչև 8-րդ դասարան սովորողներին՝ ընդգրկելով ավելի քան կես միլիոն աշակերտի։ Ուսուցիչներին նույնպես արգելվում է արհեստական բանականությունն օգտագործել աշակերտների աշխատանքները գնահատելու, նրանց վարքը վերահսկելու կամ առաջադիմության վերաբերյալ որոշումներ կայացնելու համար։ Սակայն, թույլատրվում է հաստատված գործիքներն օգտագործել դասերի պլանավորման և աշխատանքային այլ խնդիրների լուծման նպատակով։

Քաղաքապետ Զոհրան Մամդանին և Նյու Յորքի հանրակրթական դպրոցների կանցլեր Քամար Սամուելսը նոր քաղաքականության մասին հայտարարել են մինչև ուսումնական տարվա մեկնարկը։ Սակայն ամերիկյան New York Magazine-ը հոկտեմբերի 10-ի հոդվածում նշում է, որ կրթական համակարգի բազմաթիվ խնդիրների լուծման վերաբերյալ քաղաքային իշխանությունների հստակ ծրագիրը դեռևս ներկայացված չէ։

Մամդանին ընդգծել է, որ երեխաների կրթության հիմքում պետք է լինեն ուսուցիչների հետ մարդկային շփումը, հասակակիցների հետ համագործակցությունը և բարդ խնդիրներն ինքնուրույն լուծելու կարողությունը։

«Տեխնոլոգիական ոլորտի ընկերությունները ցանկանում են մեզ համոզել, որ արհեստական բանականությամբ կրթությունը վաղ տարիքում ոչ միայն անխուսափելի է, այլև անհրաժեշտ։ Մենք այդպես չենք կարծում», — հայտարարել էր քաղաքապետը։

Նոր կարգը

2026–2027 ուսումնական տարում գեներատիվ արհեստական բանականության գործիքների կիրառման արգելքը վերաբերում է մինչև 8-րդ դասարանի աշակերտներին, իսկ ավագ դպրոցում՝ 9–12-րդ դասարաններում, թույլատրվում է սահմանափակ և վերահսկվող կիրառում՝ հաստատված նպատակներով։

Նյու Յորքի հանրակրթական դպրոցների պաշտոնական ուղեցույցի համաձայն՝ ավագ դպրոցի բոլոր աշակերտները պետք է անցնեն արհեստական բանականության գրագիտության երկու՝ 45-րոպեանոց դասընթաց։ Դրանք կօգնեն հասկանալ տեխնոլոգիայի աշխատանքի սկզբունքները, դրա հնարավորություններն ու սահմանափակումները, ճանաչել կողմնակալության և անձնական տվյալների պաշտպանության հետ կապված ռիսկերը և սովորել արհեստական բանականությունն օգտագործել պատասխանատու կերպով։

Դասընթացները պետք է նպաստեն, որ աշակերտները՝

Ավագ դպրոցում թույլատրվում են նաև հաստատված հինգ փորձնական ծրագրեր՝ բացառապես ուսուցիչների վերահսկողությամբ՝ սահմանված ժամանակային սահմանաչափերով։ Յուրաքանչյուր աշակերտ կարող է մասնակցել միայն մեկ նման ծրագրի։

Կարգավորումները ներառում են նաև էկրանային ժամանակի սահմանափակումներ։

Ուսուցչի ղեկավարությամբ ամբողջ դասարանի կամ փոքր խմբերի հետ էկրանների օգտագործումը թույլատրվում է։

Բացառություններ են նախատեսված անհատական կրթության ծրագրով սահմանված օժանդակ տեխնոլոգիաների, անգլերեն սովորող աշակերտների համար անհրաժեշտ աջակցության, գնահատումների, հեռավար ուսուցման և որոշ հաստատված կրթական գործունեությունների համար, այդ թվում՝ էլեկտրոնային գրքերի, ռոբոտաշինության, ծրագրավորման ու սիմուլյացիաների։

Սմարթֆոնների արգելքը

Նյու Յորքի դպրոցներում 2025–ից գործում է առանձին կանոն, որն արգելում է աշակերտներին անձնական՝ ինտերնետին միացող սարքերն օգտագործել ամբողջ ուսումնական օրվա ընթացքում՝ առաջին զանգից մինչև վերջինը։

Մտահոգություններ

Արհեստական բանականության կիրառման սահմանափակումները քննարկվում են նաև տեխնոլոգիայի անվտանգության և դրա նկատմամբ վերահսկողության ավելի լայն համատեքստում։

Associated Press-ի հաղորդմամբ՝ Նյու Յորքի քաղաքային խորհրդի նիստում Anthropic, OpenAI և Google DeepMind ընկերությունների նախկին աշխատակիցները նախազգուշացրել են արհեստական բանականության արագ զարգացմամբ պայմանավորված վտանգների մասին և կոչ արել ուժեղացնել ոլորտի վերահսկողությունը։

Anthropic-ի նախկին ինժեներ Ջեյքոբ Քոքսոնը քննադատել է տեխնոլոգիական ընկերությունների՝ համակարգերն արագ ստեղծելու և ներդնելու գործելակերպը՝ նախազգուշացնելով, որ դրանց հնարավոր վտանգները դեռևս լիովին պարզ չեն։

Քաղաքային խորհրդի քննարկումների ընթացքում բարձրացվել են արհեստական բանականության կիրառման մասին պարտադիր տեղեկացման, անկախ աուդիտների և խախտումների մասին հաղորդող աշխատակիցների պաշտպանության հարցերը։

Նոր քաղաքականության գնահատումը

Նյու Յորքի հանրակրթական դպրոցների պաշտոնական ուղեցույցի համաձայն՝ 2026–2027 ուսումնական տարվա ընթացքում ձևավորվող «Տեխնոլոգիաները դպրոցներում» կոալիցիան պետք է առաջարկություններ մշակի դպրոցներում տեխնոլոգիաների կիրառման վերաբերյալ։ Հաշվետվությունը նախատեսվում է հրապարակել 2027 թվականի ապրիլին։ Այն կօգնի որոշել, թե ինչ մոտեցումներ կկիրառվեն 2027–2028 ուսումնական տարում։