Ռազմավարությունների ռազմավարության 2027 թ․ ծախսերը

ՀՀ 2027 թվականի պետական բյուջեի մասին օրենքի նախագծի բացատրագրի հավելվածով, գալիք տարվա կրթության ծախսերը նախատեսվում են ավելի քան 350.7 մլրդ դրամի չափով։ 2026–ին նախատեսված էր 357.7  միլիարդ դրամ։

«Հանրակրթության ծրագրի» գծով 2027 թվականին նախատեսվում է հատկացնել 144,255.8 մլն դրամ: Այս ծախսը նախորդ տարվա նախատեսվածից ավելին է 3,26 %-ով։ Ըստ «ՀՀ 2026 թվականի պետական բյուջեի մասին» օրենքի նախագծի՝ 2026 թվականին «Հանրակրթություն» ծրագրին նախատեսվել է հատկացնել 139․7 մլրդ դրամ, որը 5․2% ավելի էր 2025 թվականի հաստատված բյուջեից։

2027 թ․ ՀՀ բյուջեի մասին օրինագծի հավելվածի մեջ կրթությունը ներկայացված է որպես մարդու հիմնարար իրավունք․ «․․․պետության պարտավորությունն է ապահովել համընդհանուր հավասարապես հասանելի, ներառական և որակյալ կրթություն յուրաքանչյուրի համար»:

Ըստ բյուջետայի նախագծի, «Հայաստանում կրթության ոլորտը կարևորվում է՝ որպես երկրի կայուն առաջընթացի, մարդկային կապիտալի վերարտադրության ու զարգացման նախապայմաններից մեկը»:

Հանրային քննարկման ներկայացված օրինագծով շեշտվում է ՀՀ կառավարության 2026 թվականի հունվարի 8-ի N 16-Լ որոշմամբ հաստատված Հայաստանի տնտեսական և ինստիտուցիոնալ վերափոխման դոկտրինը, որը կառուցված է տնտեսական զարգացման նոր պարադիգմի վրա:

«Պարադիգմի առաջին և առանցքային հիմքը կրթությունն է։ Դոկտրինում կրթությունը սահմանվում է՝ որպես «ռազմավարությունների ռազմավարություն», և կրթությունն այլևս պարզապես մեկ ճյուղային քաղաքականություն չէ, այլ դոկտրինի առանցքը, որը կանխորոշում է տնտեսական զարգացման ծավալն ու բովանդակությունը, պետական կառավարման արդյունավետությունն ու ճկունությունը, ազգային ինքնության ամրությունը և պետականության հարատևության օրակարգի հաջողությունը»,– նշված է ՀՀ 2027 թվականի պետբյուջեի նախագիծի հավելվածի մեջ:

Հավելվածի համաձայն, «2027 թվականին կրթության ոլորտի գլխավոր հիմնախնդիրը կշարունակի լինել կրթական համակարգի բոլոր մակարդակներում կրթության հասանելության, որակի և արդյունավետության բարձրացումը, դրանց համապատասխանեցումը միջազգայնորեն ընդունված չափանիշներին, մատչելի, ներառական և հասանելի կրթության ապահովումը բնակչության բոլոր խավերի համար, ինչպես նաև՝ անվտանգ և ապահով միջավայրի կազմակերպումը»: