Թալինից 5 կմ հեռու՝ Դաշտադեմ գյուղի ուսուցիչներն անհանգստացած են իրենց դպրոցը Թալինի դպրոցի հետ միավորելու որոշմամբ: Անհանգստացած են 2 պատճառով. նախ, որ սա կարող է լինել գյուղի դատարկման պատճառ, քանի որ, ինչպես ուսուցիչներն են ասում՝ չկա դպրոց՝ չկա գյուղ. երիտասարդ ընտանիքները նախընտրում են ապրել այն բնակավայրերում, որտեղ երեխայի դպրոց գնալու հարցն ամենահարմար լուծումն ունի:

Ուսուցիչների անհանգստության երկրորդ պատճառն այն է, որ այս դպրոցը փակելու հեռանկարը խարխլում է հույսերը, որ իրենք նույնպես կարող են աշխատանք ունենալ թեկուզ հարևան բնակավայրի դպրոցում: Ուսուցիչների աշխատատեղերն, ի վերջո, սահմանափակ են: Թալինի դպրոցում էլ Դաշտադեմի ուսուցիչների ընդունելության համար պետք է կազմակերպվի մրցույթ: Իսկ այստեղ խնդիրները քիչ չեն:

Մեր հարցին, թե 21 ուսուցչից քանի՞սն է ատեստավորվել, մեր զրուցակից ուսուցիչն ասաց՝ ընդամենը 3 -ն են կամավոր ատեստավորվել:

Սա հանրապետության մասշտաբով անցկացվող ատեստավորման պատկերից շատ հեռու ցուցանիշ չէ: Բայց մեր զրուցակից ուսուցիչը, որ չցանկացավ հրապարակավ հանդես գալ, պատճառաբանեց, թե ատեստավորման փորձ չեն արել, քանի որ տարիներ շարունակ լսել են, որ իրենց դպրոցը, ի վերջո, միավորվելու է Թալինի դպրոցի հետ, և ուսուցիչների ճակատագիրն անհայտ է, որոշել են զերծ մնալ հավելյալ ռիսկերից ու սթրեսից:

mediaforedu.am-ին այս խնդրի մասին վկայած ուսուցիչը զարմացած հարցնում է, թե ինչ կարիք կա փակել դպրոցը, եթե այն բարվոք վիճակում է և դեռ կարող է երկար տարիներ էլ ծառայել:

Դպրոցն այժմ ունի 53 աշակերտ:

Պետությունը դպրոց փակելու փոխարեն պարտավոր էր ժամանակին քայլեր ձեռնարկել գյուղերի շենացման ուղղությամբ, երիտասարդ ընտանիքների համար հարմարավետ պայմաններ ստեղծելով ու արտագաղթը բացառելու համար, և ոչ թե փակեր դպրոցը, այլ մեծացներ:

mediaforedu.am-ը գրավոր հարցում է պատրաստել՝ ԿԳՄՍ նախարարությունից ակնկալելով ստանալ հարցի պատասխանը, թե իրո՞ք Դաշտադեմի դպրոցը միավորվելու է Թալինի դպրոցի հետ և ի՞նչ հիմնավորմամբ, բացի այդ, հետաքրքիր է՝ քանի՞ նման դպրոցներ են կանգնած միավորվելու փաստի առջև ու քանի՞ ուսուցիչ կմնա անգործ: