Չինաստանը հայտարարել է Տիբեթում իր խնդրահարույց կրթական քաղաքականությունը շարունակելու մասին:

Tibetan review պարբերականն ընդգծում է, որ Չինաստանն այս որոշումը կայացրել է՝ «կենտրոնանալով քաղաքացիական կրթության վրա՝ անտեսելով տիբեթցի երեխաներին ծնողներից և հասարակությունից հարկադրաբար բաժանելու վերաբերյալ հանդիմանությունը և երեխաներին ստիպելով մտածել ու գործել այնպես, ինչպես էթնիկ չինացիները, որոնք անխոս հավատարիմ են միայն Չինաստանի Կոմունիստական ​​կուսակցությանը»:

Chinadaily-ի փոխանցմամբ, Պեկինում տեղի ունեցած 14-րդ Ազգային ժողովրդական կոնգրեսում Տիբեթի վարչական ղեկավար Գամա Ցեդայնն ասել է, թե Տիբեթի ինքնավար շրջանը կշարունակի խթանել քաղաքացիական կրթությունը՝ չնայած 14-րդ Դալայ Լամայի և նրա հետևորդների բազմաթիվ միջամտություններին:

Ցեդայնը դժգոհել է, թե Չինաստանի կրթական կենտրոնը Տիբեթում «անընդհատ արատավորում և խաթարում է Դալայ Լաման և նրա խումբը»: Ապա ավելացրել է, թե իրենց «չեն շեղի»:

Տիբեթի հոգևոր առաջնորդը, ամենևին չնսեմացնելով անխնա քննադատվող Չինաստանի նպատակները՝ կապված դպրոցով քաղաքականություն պարտադրելու հետ, իր զրույցներում մշտապես դրսևորում է ինքնատիպ մոտեցում՝ դպրոցին, կրթությանն ու գիտելիքին:

Դալայ Լաման իր զրույցներից մեկի ժամանակ ասել էր. «Տիբեթում չինացիների հիմնած դպրոցների դեպքում չափազանց նեղմիտ կլինի նրանց հանդեպ արհամարհանքը ցույց տալ այնպիսի գործողություններով, ինչպիսին է երեխաներին այնտեղ սովորելու չուղարկելը: Նույնիսկ եթե դպրոցները ստեղծել է Չինաստանի կառավարությունը, լավն են: Տիբեթերենի և դրանցում այլ առարկաների դասավանդման լավ չափանիշ ապահովելու համար պետք է հնարավոր լինի այդ հարցը քննարկել շահագրգիռ անձանց և կազմակերպությունների հետ: Ինչ էլ որ լինի, բոլոր տիբեթցիները պետք է ջանքեր գործադրեն ամեն կերպ»։

Չինաստանի քաղաքականությունը Տիբեթում հաճախ քննադատվում է որպես մշակութային ու լեզվական ձուլման քաղաքականություն, որի նպատակն է նվազեցնել տիբեթյան ինքնության ազդեցությունը հաջորդ սերունդների վրա։