Ուսուցիչների կամավոր ատեստավորման քննություններն այս տարի անցկացվում են էլեկտրոնային եղանակով։

Երևանում և ՀՀ բոլոր մարզերում ձևավորվել են 35 քննական կենտրոններ, որոնք կահավորվել են համապատասխան սարքավորումներով, ապահովվել գերարագ ինտերնետային կապով:

Ատեստավորման էլեկտրոնային համակարգը նախապես փորձարկվել է։ Տեղեկացնում է ՀՀ ԿԳՄՍՆ-ն։

Այս տարի կամավոր ատեստավորմանը մասնակցելու հայտ է ներկայացրել ավելի քան 6000 մանկավարժ։

Կամավոր ատեստավորման քննություններն, ըստ Նախարարության, սկսվել են նոյեմբերի 9-ից, կշարունակվեն մինչ նոյեմբերի 24-ը՝ ժամը 10:00-ին և 15:00-ին:

Նոր ձևաչափով անցկացվող ատեստավորման ընթացակարգին ծանոթանալու և քննությանը նախապատրաստվելու նպատակով ուսուցիչները քննական կենտրոնում պետք է լինեն մեկնարկից առնվազն 1 ժամ առաջ՝ անձը հաստատող փաստաթղթով: Ուսուցիչներն իրենց հետ պետք է ունենան նաև համակարգ մուտք գործելու տվյալները՝ մուտքանունը և գաղտնաբառը: Նշում է ԿԳՄՍՆ-ն։