Եվրոպական Միության կրթության նախարարների հաստատած երկու առանցքային փաստաթղթերը հիմք են ստեղծում Եվրոպական համատեղ դիպլոմի (European Degree) ձևավորման համար։ Նախաձեռնության նպատակը փոխադարձ ճանաչվող բարձրագույն կրթության զարգացումն է, որը ուսանողներին հնարավորություն կտա միաժամանակ սովորել մի քանի եվրոպական երկրում և ստանալ մեկ միասնական դիպլոմ։

Մայիսի 12-ին հաստատված փաստաթղթերի ուժով այս ծրագիրը նախատեսվում է կյանքի կոչել երեք փուլով՝ 2025-ից մինչև 2029 թվականը։ Այն ներառում է մի շարք կարևոր բաղադրիչներ՝ դիպլոմների ավտոմատ ճանաչում, որակի ապահովման համատեղ մեխանիզմներ, ինչպես նաև համակարգված կառավարման մոդել, որը կհեշտացնի գործընկեր համալսարանների համագործակցությունը։ Բացի այդ, նախաձեռնությունը միտված է բյուրոկրատական խոչընդոտների նվազեցմանը և ուսանողների ու դասախոսների ազատ տեղաշարժի խթանմանը ԵՄ ներսում։

Նոր մոդելը դիտարկվում է որպես եվրոպական բարձրագույն կրթության գոտու ամրապնդման և համալսարանների միջազգային գրավչության բարձրացման միջոց։ Այն նաև արձագանք է գլոբալ կրթական մրցակցությանը և գիտելիքի արտահոսքին՝ նպատակ ունենալով պահպանել ու զարգացնել Եվրոպական ակադեմիական ներուժը։