ՀՀ ԿԳՄՍ նախարարությունը պատասխանել է mediaforedu.am կայքի՝ 25.05.2026 թ․ գրավոր հարցմանը՝ կապված ՀՀ ԱԺ ընտրություններում նախընտրական քարոզարշավի ժամանակ դպրոցների տնօրենների և ուսուցիչների թույլ տված իրավախախտումների հետ։

ՀՀ ԱԺ նախընտրական քարոզարշավի մեկնարկից մեկ շաբաթ անց «Ականատես» դիտորդական առաքելությունը փաստեց, որ մայիսի 13-ին վարչապետի մասնակցությամբ իշխող «Քաղաքացիական պայմանագիր» կուսակցության նախընտրական քարոզարշավի շրջանակներում Ապարանում արձանագրվել են հանրակրթական ուսումնական հաստատություններում քաղաքական գործունեության արգելքի խախտման և քարոզչությանը անչափահասների ներգրավման դեպքեր, համայնքի և հարակից բնակավայրերի մի շարք դպրոցների տնօրեններն ու ուսուցիչները դասերի ժամանակ կազմակերպված մասնակցել են միջոցառմանը։

Ըստ «Ականատեսի», ուսուցիչների և տնօրինության անմիջական հրահանգով աշակերտները «դուրս են բերվել դասապրոցեսից՝ վարչապետին դիմավորելու և քարոզչական միջոցառմանը մասնակցություն ապահովելու նպատակով։ Երեխաներին բաժանվել են դրոշներ, ընդ որում, դպրոցականներին նախապես տրվել են պարտադրողական բնույթի ցուցումներ անգամ արտաքին տեսքի, հագուստի, ինչպես նաև սանրվածքի վերաբերյալ՝ հորդորելով լինել հյուսերով»։

Այս հայտարարությունից հետո ԿԳՄՍ նախարար Ժաննա Անդրեասյանը ՖԲ – ում գրեց, որ Արագածոտնի մարզում քարոզարշավին դպրոցների մասնակցության գրանցված դեպքերով նախարարությունը կանցկացնի առանձին քննություն՝ հանգամանքները պարզելու և օրենքով սահմանված հետևանքները կիրառելու համար, որևէ դեպք անպատիժ և անհետևանք չի մնալու։

Քանի որ նախարարի հրապարակային խոստմանը որևէ փաստացի արդյունք չէր հաջորդել, mediaforedu.am – ը նախ խնդրել էր պատասխանել հարցին, թե ինչ է պարզվել նախարարության ձեռնարկած քննությամբ։

ՀՀ ԿԳՄՍ նախարարի տեղակալ Արաքսիա Սվաջյանի ստորագրությամբ պաշտոնական պատասխանի մեջ նշված է․ «Աշխատանքային ժամերին և ուսումնական գործընթացի ընթացքում քաղաքական քարոզարշավի դեպքեր են արձանագրվել ՀՀ Արագածոտնի մարզի Արագած, Քուչակ և Բերքառատ գյուղերի հանրակրթական դպրոցների մանկավարժների և սովորողների մասնակցությամբ»։

Մեր հաջորդ հարցը ձևակերպվել էր այսպես․ «Ի՞նչ լրացուցիչ միջոցառումներ են ձեռնարկվել հանրակրթական ուսումնական հաստատություններում նման դեպքերի բացառման ուղղությամբ»։

ՀՀ ԿԳՄՍ նախարարությունը պատասխանել է․ «Մայիսի 12-ին ՀՀ հանրակրթական ուսումնական հաստատություններին ուղարկվել է շրջաբերական գրություն, որով շեշտադրվել է «Հանրակրթության մասին» ՀՀ օրենքի 4-րդ հոդվածի 8-րդ մասի պահանջը, համաձայն որի՝ ուսումնական հաստատություններում արգելվում է իրականացնել քաղաքական գործունեություն և քաղաքական քարոզչություն։

Միաժամանակ հստակ սահմանվել է, որ հանրակրթական ուսումնական հաստատություններում աշխատող այն անձինք, որոնք ընդգրկված են որևէ քաղաքական կուսակցության նախընտրական ցուցակում, նախընտրական քարոզարշավի ընթացքում իրավունք չունեն համատեղելու իրենց մասնագիտական պարտականությունները»:

Նաև հետաքրքրվել էինք՝ նախարարությունը իրավապահ մարմիններից տեղեկություններ ստացե՞լ է, թե նախորդ նմանատիպ 3 ահազանգերի առնչությամբ ինչ արդյունքներ կան և որոնք են այդ արդյունքները։

ՀՀ ԿԳՄՍ նախարարության պատասխանն է․ «Վերոնշյալ խախտումների կապակցությամբ նշված դպրոցների տնօրենների նկատմամբ կիրառվել է կարգապահական տույժ՝ հայտարարվել է խիստ նկատողություն, իսկ արձանագրություններն ուղարկվել են համապատասխան իրավապահ մարմիններին, որոնք դեռևս ընթացքի մեջ են»:

ՀՀ ԿԳՄՍ նախարարության պատասխանը ստանալու պահին քարոզարշավին մնացել է 5 օր։