ԵՊՀ փիլիսոփայության և հոգեբանության ֆակուլտետի փիլիսոփայության պատմության, տեսության և տրամաբանության ամբիոնի դոցենտ Ատոմ Վարդումյանին հանդիպեցինք ԵՊՀ-ում: Նա www.mediaforedu.am-ի հետ զրույցում անդրադարձավ հանրակրթական դրոցներում առկա մի քանի խնդրի.

«Դպրոցում շատ բան է ինձ անհանգստացնում. սկսած՝ կրթության մակարդակից, ավարտված՝ կադրերի ընտրության նման սկզբունքներով: Բայց ես հիմնականում կուզեի 2 բանի մասին խոսել. մեկը զուտ բարոյական տեսանկյունից (գուցե նաև ֆինանսական տեսանկյունից, բայց ինձ համար դա ավելի շատ բարոյական խնդիր է): Եվ երկրորդը՝ ուսուցչի պաշտպանվածությունը»,- ասաց Ատոմ Վարդումյանը:

Դոցենտի գնահատմամբ՝ «եթե բոլոր ժամանակներում ուսուցիչները եղել են, էսպես ասած, ամենահալածված, ամենաանաշխատավարձ խավը, էս պարագայում ավելացել են ևս որոշ «բարոյական բաներ», որոշ «արտոնություններ»՝ նրանց նկատմամբ, որը, իրոք, շատ ցավալի հետևանքներ է բերում»:

Ատոմ Վարդումյանն ասաց, որ իր կինը դպրոցի փոխտնօրենի պարտականություններն է կատարում և անձամբ է տեսնում, թե ինչ սթրեսային պայմաններում են աշխատում դպրոցի ղեկավարները. «Իմ կինը փոխտնօրեն է, ուսմասվար, էսպես ասած: Եվ տնօրենի ժամկետն ավարտվել է, իսկ նոր տնօրենի նշանակումը հաճախ տևում են տարիներ: Այդ ընթացքում տնօրենի պարտականությունները դրվում են փոխտնօրենի՝ ուսմասվարի վրա: Այսինքն, նա տանում է 2 հաստիք: Եթե կարելի է դպրոցը, 2 հասիքը մի մարդու վրա թողնել…, ինչո՞ւ են 2 հաստիք պահում: Դե, իհարկե, դա այդպես չէ, դա հնարավոր չէ:

Եթե տեսնեք, թե նա էս օրերին ինչ ծանրաբեռնվածությամբ և ինչ նևրոզով է աշխատում… Անմարդկային է նման ծանրաբեռնվածությունը:

Կամ փոխարինող բերեք, կամ՝ դրա բարոյական կողմը…Թող ուրիշը համարի ֆինանսական, բայց ինձ համար բարոյական է:

Ուրեմն մարդը տանում է 2 հաստիք և նրան տարիներով վճարել ցածր հաստիքի աշխատավա՞րձ: Սա գումարների խնայողությո՞ւն է: Անհասկանալի բան է»:

Ատոմ Վարդումյանը նաև դժգոհեց, որ դպրոցների ղեկավարները հաճախ ստանում են նախարարությունից ուղարկված, պարտադիր կատարման ենթակա հրահանգներ, որոնց պատասխանն առնվազ մի քանի օր առաջ պետք է արդեն (նախարարություն) ուղարկված լիներ:

Ըստ Ատոմ Վարդումյանի, կարևոր է նախարարին հուշելը՝ գուցե նրա հրամանները կամ շրջաբերականները ներքին օղակներում կասեցվում են առժամանակ՝ դրանով առաջացնելով բողոք կամ դժգհություն:

Դոցենտի խոսքով՝ տեղին կլինի, որ նախարարը ճշտի, թե ներքին օղակները որքանով են իր հրահանգներն ու հարցումներն օպերատիվ հասցնում դպրոցներ…