Միացյալ Թագավորության կառավարությունը հայտարարել է, որ 2026 թվականի սեպտեմբերից Մեծ Բրիտանիայում ևս 500․000 երեխա կսկսի անվճար սնունդ ստանալ դպրոցում։

Այս փոփոխությունը կազատի ընտանիքներին տարեկան մոտավորապես 500 ֆունտ ստերլինգի (մոտ 640 ԱՄՆ դոլար) չափով ծախսից։

Նախարար Բրիջեթ Ֆիլիպսոնը նշել է, որ այս քայլը միտված է բարձրացնելու նաև աշակերտների առաջադիմությունը․ «Երբ երեխան քաղցած է, կենտրոնանալը գրեթե անհնար է»։

Կառավարությունը նախատեսում է մինչև 2029 թվականը տրամադրել 1 միլիարդ ֆունտ ստերլինգ՝ ծրագրի ֆինանսավորման համար։ Միաժամանակ, 13 միլիոն կուղղվի սննդի բարեգործական կազմակերպություններին՝ սննդային աղքատության դեմ պայքարելու նպատակով։

Որպես ավելի լայն քաղաքականության մաս՝ ծրագրվում է նաև վերանայել դպրոցական ճաշացանկերի որակի ստանդարտները, որպեսզի դրանք լինեն ավելի առողջարար և հավասարակշռված։

Սոցիալական քաղաքականության ոլորտի մասնագետներն ու կրթական կազմակերպությունները ողջունել են այս քայլը՝ այն դիտելով որպես իրական հնարավորություն՝ երեխաների սովի դեմ պայքարում և կրթական միջավայրի բարելավման գործում։

Ներկայում Մեծ Բրիտանիայում մոտ 2.2 միլիոն երեխա՝ աշակերտների մոտ 26%-ը արդեն օգտվում է անվճար դպրոցական ճաշերից։