ԿԳՄՍ նախարարության՝ mediaforedu.am-ին փոխանցած գրավոր պատասխանին կից տեղեկանքների համաձայն, «Կրթության զարգացման և նորարարությունների ազգային կենտրոն» (ԿԶՆԱԿ) հիմնադրամի «Դպրոցական սնունդ և երեխաների բարեկեցություն» հիմնարկը Կրթական տեխնոլոգիաների ազգային կենտրոնի (ԿՏԱԿ) հետ համագործակցությամբ ստացել է տեղեկություն ՄԱԿ-ի Պարենի համաշխարհային ծրագրի վերաբերյալ:

mediaforedu.am-ը ԿԳՄՍ նախարարին գրավոր հարցում էր ուղարկել փետրվարի 4-ին: ԿԳՄՍ-ն պատասխանը փոխանցել է մարտի 4-ին:

Ըստ ԿԳՄՍՆ-ի, ՄԱԿ-ի Պարենի համաշխարհային ծրագրի «Դպրոցական սնունդ» նախաձեռնությունը Հայաստանում իրականացվում է 2010 թվականից ՄԱԿ-ի Պարենի համաշխարհային ծրագրի և ՀՀ կառավարության միջև կնքված համաձայնագրով՝ նպատակ ունենալով ստեղծել դպրոցական կայուն սննդի համակարգ: Ազգային ծրագրի շրջանակում սնունդ է տրամադրվում տարրական դասարանների և դպրոցի նախապատրաստական խմբեր ունեցող բոլոր հանրակրթական դպրոցներին:

2021-2024 թվականներին 1-4-րդ դասարանի ավելի քան 100 000 դպրոցական ապահովվում է սննդով։

Ծրագրում նախ ընդգրկվել է վեց մարզ՝ Վայոց Ձոր, Սյունիք, Արարատ, Տավուշ, Շիրակ և Արագածոտն: 2022-ին ծրագրով ավելացել է նաև Արմավիրի մարզը, 2023-ին՝ Կոտայքի և մյուս մարզերի դպրոցները։

Ըստ Պարենի համաշխարհային ծրագրի տվյալների, 2023 թվականին ծրագիրը իրականացվել է 10 մարզերում և 2023 թվականից արդեն ամբողջությամբ փոխանցվել է ՀՀ կառավարությանը։

«Դպրոցական սնունդ» ծրագիրը, որն ավելի քան 13 տարվա համագործակցությամբ իրականացվում էր ՀՀ մարզերում, այսուհետ ամբողջությամբ կկատարվի պետական բյուջեի միջոցներով,- 2023-ին հայտարարել էր ԿԳՄՍ նախարարությունը:

Ծրագրի իրականացման համար, ըստ ՄԱԿ-ի գրասենյակի, 2022 թվականին նախատեսված է եղել 17մլն ԱՄՆ դոլլար, իսկ 2023-ին՝ 11 մլն դոլար։

Ըստ «Կրթության զարգացման և նորարարությունների ազգային կենտրոն» հիմնադրամի, «Դպրոցական սնունդ և երեխաների բարեկեցություն» հիմնարկի տեղեկանքի, 2021 թվականին 1-4-րդ դասարաններում սովորող մոտ 102 հազար աշակերտ է օգտվել ծրագրից, 2022 թվականին՝ 102 հազար աշակերտ, 2023 թվականին՝ ավելի քան 105 հազար աշակերտ, իսկ 2024 թվականին՝ 104 հազար աշակերտ։

Ծրագրի ծախսերը տարիների ընթացքում աճել են կապված աշակերտների թվի աճով։ 2021 թվականի ծախսեը կազմում է 3 մլրդ. դրամ, 2022թ․ ծախսը աճել է 0․03 տոկոսով՝ կազմելով 3․07 մլրդ. դրամ, 2023 թվականին՝ 3․17 մլրդ. դրամ, իսկ 2024թ․ ծախսերը նվազել են 1,1 տոկոսով՝ կազմելով 3,13 մլրդ. դրամ։

Ըստ «Կրթական տեխնոլոգիաների ազգային կենտրոն»-ի, ծրագրին մասնակցում են Հայաստանի 10 մարզերի դպրոցները։ Մարզերի դպոցների թիվը՝ ըստ պաշտոնական տվյալների՝ գծապատկեր 1, 2, 3 և 4-ում։

Գծապատկերներից երևում է, որ տարիների ընթացքում մարզերի դպրոցների թիվը էականորեն չի փոխվել։ Ամենաշատ դպրոցները, որտեղ աշակերտներին տրամադրում են սնունդ, Լոռու մարզն է, այնուհետև Շիրակը, Արագածոտնը և Գեղարքունիքը, իսկ ամենաքիչը՝ Վայոց Ձորի դպրոցները:

Ըստ ԿԳՄՍ նախարարության, այս ծրագիրը հնարավորություն է ընձեռում ապահովել Հայաստանի բոլոր մարզերի հանրակրթական դպրոցների տարրական դասարանների աշակերտների առողջ սնունդը, բարելավել երեխաների առողջությունն ու հաղթահարել աղքատությունը` նպաստելով դպրոցականների հաճախելիության բարձրացմանն ու համընդհանուր տարրական կրթության ձեռքբերմանը:

Էլենա Հարությունյան