Նոր Զելանդիայի կրթության նախարար Էրիկա Ստենֆորդը հանձնարարել է տարրական դպրոցի նոր դասագրքերում նվազեցնել մաորի լեզվի օգտագործումը։ NZ Herald-ի հրապարակած փաստաթղթերից պարզվում է, որ նախարարն առաջարկել է 1-3-րդ դասարաններում մաորի լեզվով արտահայտված բառերը կիրառել միայն պարզ բացատրություններով, որպեսզի չխանգարեն ընթերցանության հմտությունների զարգացմանը։

Քննադատները նշում են, որ այս մոտեցումը հակասում է վերջին տասնամյակների քաղաքականությանը, որի նպատակն է պահպանել և զարգացնել մաորի լեզուն։ Այն Նոր Զելանդիայի երեք պաշտոնական լեզուներից է (անգլերեն, որով խոսում է բնակչության մեծ մասը, մաորի ժողովրդի լեզուն, պաշտոնապես ճանաչվել է 1987 թվականին, նորզելանդական ժեստերի լեզուն, որը պաշտոնական կարգավիճակ ունի 2006 թվականից և օգտագործվում է լսողության խնդիրներ ունեցողների շրջանում)։ Մաորին վերջին տարիներին դպրոցներում ներառվում է ուսումնական ծրագրում՝ որոշ կրթական հաստատություններում ամբողջությամբ մաորիով դասավանդմամբ։

Չնայած պետական աջակցությանը, լեզվի ուսուցումը շարունակում է բախվել մասնագետների պակասի և դասաժամերի սահմանափակ լինելու խնդիրներին։ Նախարարի վերջին առաջարկը դիտարկվում է այս շարունակական կրթական և քաղաքական վեճերի շրջանակում։