Լուսանկարը՝ ANTARA-ի կայքից
Ինդոնեզիայի կրթության նախարար Աբդուլ Մութին կոչ է արել ձևավորել դրական վերաբերմունք մաթեմատիկայի նկատմամբ՝ նպատակ ունենալով բարձրացնել երկրի արդյունքները միջազգային PISA հետազոտությունում։ Նրա խոսքով՝ մաթեմատիկայի հանդեպ հասարակության մեջ ձևավորված բացասական պատկերացումները խոչընդոտում են երեխաների տրամաբանական և վերլուծական մտածողության զարգացմանը։
Նախարարությունը սկսել է շարժում, որի նպատակն է ցույց տալ թվագիտության կիրառելիությունը առօրյա կյանքում՝ դուրս գալով միայն դասագրքային խնդիրներ լուծելու շրջանակից։ Նախարարի համոզմամբ՝ այս մոտեցումը կնպաստի սովորողների հետաքրքրության աճին և կբարելավի նրանց կարողությունները տարբեր գիտական ոլորտներում, ինչը նաև կօգնի բարձրացնել Ինդոնեզիայի դիրքերը PISA գնահատման համակարգում։
Նախարարն ընդգծել է նաև, որ կառավարությունը վերջերս ավելացրել է կրթության բյուջեն, իսկ դա հնարավորություն կտա ավելի արդյունավետ իրականացնել նախաձեռնած ծրագրերը։
