Լուսանկարը՝ eap-csf.eu կայքից
«Մեդիան հանուն կրթության» ՀԿ-ն մասնակցում է ԵՄ Արևելյան գործընկերության քաղաքացիական հասարակության ֆորումի՝ այսօր Բրյուսելում սկսված Քաղաքացիական հասարակության գագաթաժողովին։
Նախատեսվում է քննարկել Արևելյան գործընկերության վերաիմաստավորման ուղիները, համագործակցության նոր կամուրջների ստեղծման հնարավորությունները և այլ ռազմավարությունների ու շրջանակների հետ փոխլրացման մեխանիզմները։
«Մեդիան հանուն կրթության» ՀԿ-ն ներկայացված է 4-րդ աշխատանքային խմբում, որի հետաքրքրության ոլորտներն են կրթությունը, մշակույթը, արվեստը, երիտասարդությունը, մեդիան՝ որպես միջանձնային կապերի միջոց, հետազոտությունն և նորարարությունը:
Գագաթաժողովը համախմբում է ավելի քան 250 առաջատար քաղաքացիական կազմակերպությունների ներկայացուցիչների ու որոշում ընդունող պաշտոնյաների՝ ԵՄ-ից, անդամ պետություններից և Արևելյան գործընկերության երկրներից։
Քննարկումների առանցքում կլինեն տարածաշրջանի ժողովրդավարական վիճակը, ֆինանսավորման ընդհատման և քաղաքացիական հասարակության աշխատանքի վրա դրա ազդեցությունը՝ նպատակ ունենալով ձևավորել արդյունավետ լուծումներ ու ամրապնդել համագործակցությունը այս մարտահրավերներով պայմանավորված նոր միջավայրում։
