Հյուսիսային Իռլանդիայի դպրոցներից մեկի ավելի քան 1000 աշակերտի նամակը կրթության նախարար Փոլ Գիվենին ստիպել է ներկայանալ դպրոց։ Բելֆաստի աշակերտները գրել են, որ անհրաժեշտ է ունենալ մարզադահլիճ։ Գրում է BBC -ն։

Դպրոցը կառուցվել է 1968 թվականին և չի համապատասխանում ժամանակակից պահանջներին: Դպրոցում քննարկվում է նոր դահլիճի կառուցումը, որը կծառայի նաև տեղական համայնքին, սակայն դրա իրականացումը կախված է կրթության նախարարության ֆինանսավորումից:

Նախարարը նշել է, որ վերջին տարիներին փոքր նախագծերը սահմանափակվել են միայն արտակարգ ու պարտադիր վերանորոգումներով, իսկ դա անընդունելի է:

Աշակերտները BBC-ի հետ զրույցում իրենց դժգոհությունն են հայտնել՝ ընդգծելով, որ սպորտը կարևոր նշանակություն ունի: 18-ամյա Շոնն ասել է, որ ավելի լավ պայմանները կնպաստեն տաղանդների զարգացմանը:

Հյուսիսային Իռլանդիայի հաշվեքննիչ պալատի վերջին զեկույցի համաձայն՝ բազմաթիվ դպրոցներ խոշոր ներդրումների կարիք ունեն։ Նախարարի հաշվարկով, անհրաժեշտ են հարյուր միլիոնավոր ֆունտեր՝ դպրոցների արդիականացման համար։