Բրիտանացի մտավորականները պահանջում են հանրակրթական դպրոցներում դասավանդել բանավոր խոսքի հմտություններ բոլոր առարկաների շրջանակներում՝ բանավոր խոսքի և լսելու հմտությունների զարգացումն ընդգրկելով որպես ազգային ուսումնական ծրագրի հիմնական բաղադրիչ։

Բաց նամակով, որը հասցեագրված է վարչապետ Քիեր Սթարմերին, 60 հանրահայտ գրողներ, մանկավարժներ և նախկին նախարարներ պահանջում են բանավոր խոսքի հմտությունը դարձնել հիմնական կարողություն՝ կարդալու, գրելու և հաշվարկի կողքին։

Guardian պարբերականը շեշտում է, որ վերջին տարիներին համավարակն ու սոցիալական անհավասարությունը խորացրել են դպրոցականների լեզվական խնդիրները։ Աշակերտների զգալի մասը կրթություն է ստանում առանց բավարար խոսքի ու լսելու հմտությունների, իսկ դա շատ դեպքերում հանգեցնում է խնդիրների։

Թեև Մեծ Բրիտանիայում շուրջ 1000 դպրոց արդեն համագործակցում է Voice 21 կազմակերպության հետ՝ բանավոր խոսքի զարգացման նպատակով, նոր ուսումնական ծրագրի միջանկյալ տարբերակում այս հմտությունները բացակայում են։ Այս հանգամանքն է մտահոգություն առաջացրել մասնագետների շրջանում։

Կրթության մասնագետները հիմնավորում են, որ արհեստական բանականության զարգացման պայմաններում գրավոր աշխատանքը կարող է մեխանիկորեն կատարվել, մինչդեռ բանավոր խոսքի հմտությունները մարդու բացառիկ կարողություններից են։ Հենց այդ պատճառով հեղինակները պահանջում են բանավոր խոսքն ու հաղորդակցությունը դասավանդել նույն կարևորությամբ, ինչպես կարդալն ու գրելը։