Հայոց լեզվի և մաթեմատիկայի գրավոր աշխատանքների միավորները, պաշտոնական տվյալներով, նվազել են նախորդ տարվա համեմատ:

Եթե 2023 թվականին հայոց լեզվի թելադրության միջին միավորն, ըստ ՀՀ կրթության տեսչական մարմնի տարեկան հաշվետվության, եղել է 5,3, ապա 2024 թվականին, ըստ տեսչական մարմնի ղեկավար Վաղարշակ Մատիկյանի՝ օրերս հրապարակած ցուցանիշի, 4,4 միավոր է:

Միջին միավորի նվազման պատկեր է արձանագրվել նաև մաթեմատիկայից:

Եթե 2023 թվականին մաթեմատիկայի միջին գնահատականն, ըստ տարեկան հաշվետվության, 4,5 միավոր էր, ապա 2024 թվականին, ըստ Կրթության տեսչական մարմնի ղեկավար Վաղարշակ Մատիկյանի՝ օրերս հրապարակած տվյալի՝ 4,1 միավոր է։

Այս տվյալները հաշվարկվել են 10 միավորային սանդղակով: Գնահատակններն, ըստ տեսչական մարմնի, «բավարար» միավորներ են (10 միավորային սանդղակով՝ 1-3՝ «անբավարար», 4-6՝ «բավարար», 7-8՝ «լավ», 9-10՝ «գերազանց»)։

2024 թվականին Կրթության տեսչական մարմինը 46 դպրոցում է իրակացրել ստուգումներ։ Իսկ 2023-ին՝ 43 դպրոցում՝ 6-րդ, 9-րդ և 11-րդ դասարաններում:

2024 թվականին «Հայոց լեզու» առարկայից գրավոր աշխատանքին մասնակցել է 5163 սովորող, մաթեմատիկայի գրավոր աշխատանքին՝ 5098։

2023 թվականին հայերենից թելադրություն գրել է 4481 սովորող, մաթեմատիկայից գրավոր աշխատանք կատարողները եղել են 4482-ը։

Այսինքն, նախորդ տարվա համեմատ 2024 թվականին ստուգումներն իրականացվել են առավել լայն շրջանակում:

Փաստորեն, գրավոր աշխատանքների արդյունքները բարելավվելու փոխարեն վատթարացել են։ Սա հիմք է տալիս պնդելու, որ կրթության որակի բարելավում չկա:

Էլենա Հարությունյան