Արձագանքելով հանրակրթական դպրոցներում 2024 թվականից ազգային երգուպար առարկայի ներդրման ֆինանսավորման դադարեցման վերաբերյալ Լիլիթ Հարությունյանի հարցին՝ Հայկական պետական մանկավարժական համալսարանի պարարվեստի մանկավարժության և դասավանդման մեթոդիկայի ամբիոնի դոցենտ, պարուսույց Սուրեն Խաչատրյանը գնահատել է. «Ցանկացած ուսումնական պրոցես կազմակերպելու համար բյուջեն կարևոր է, բայց պետք է հասկանալ որ պարուսուցման դասընթացը դպրոցում շատ կարևոր է»:

Ըստ Սուրեն Խաչատրյանի, «կան հիմքեր, նախադրյալներ, կա մեզ հասած տվյալներ, որ անցյալում մեր պապերը, մեր նախնիները հենց պարով էին դաստիարակում շատ ու շատ բաներ, նույնիսկ այն համայնքներում, որտեղ դպրոցներ չկային, հենց պարի միջոցով մարդկանց մեջ սերմանում էին ամենատարբեր կարևոր հատկանիշները, որոնք պետք էին տվյալ համայնքի անդամներին ապրելու և սերունդներ տալու, մեծանալու, իրենց գոյության համար պայքարելու, ռազմի պատրաստվելու, տարբեր կենցաղային հարցեր լուծելու համար: Պարի միջոցով էին դաստիարակվում»։

ՀՀ պետական բյուջեով «Ազգային երգ ու պար» միջոցառումը ֆինանսավորում ստացել է մինչև 2023 թվականը: Այն ներառված է եղել «Հանրակրթություն» ծրագրում: Առարկայի ներդրման համար 2021-2023 թվականներին ուղղվել է 7,7 մլն. դրամ: 2024 թվականից այս ծրագրի ֆինանսավորումը դադարեցվել է:

«Ազգային երգ ու պար» առարկան դասավանդվում էր 5-րդ, 6-րդ, 7-րդ դասարաններում։

Էլենա Հարությունյան