Լուսանկարը՝ ՀՀ ԿԳՄՍ նախարարության կայքից
Թեև սոցիալական հարթակներն ու որոշ լրատվամիջոցներ բարձրաձայնել են քիմիայի թեստերի հետ կապված խնդիրները ԿԳՄՍ նախարարի գլխավորությամբ այսօր տեղի ունեցած Հանրապետական ընդունող հաձնաժողովի նիստի մասին հաղորդագրության մեջ անդրադարձ չկա դրանց։
Նախարարության հաղորդագրությունից տեղեկանում ենք, որ քննարկվել է ՀՀ բուհերի՝ 2025-2026 ուստարվա՝ ըստ մասնագիտությունների առկա ուսուցմամբ բակալավրի ու անընդհատ և ինտեգրացված կրթական ծրագրերով ընդունելության հիմնական փուլի նախնական արտոնություններ ունեցող դիմորդների արդյունքները:
Գնահատման և թեստավորման կենտրոնի տնօրեն Արմեն Փաշայանը ներկայացրել է ընդունելության հիմնական փուլի նախնական արդյունքները՝ նշելով, որ ընդունելության քննությունների արդյունքները հրապարակվելու են հուլիսի 18-ին:
Այս տարի ևս դիմորդներն ընդունելության քննություններ են հանձնել 2 անգամ. առաջին փուլը կազմակերպվել է հունվարին, իսկ երկրորդ և երրորդ փուլերի քննություններն անցկացվել են հունիս և հուլիս ամիսներին:
ԳԹԿ տնօրեն Արմեն Փաշայանը տեղեկացրել է, որ ՀՀ կառավարության որոշմամբ բուհերի ընդունելության նպատակով հատկացվել է 12126 տեղ, որից 2142-ը՝ անվճար, իսկ 9984-ը՝ վճարովի: Վճարովի համակարգ այս տարի ընդունվել է 9547 դիմորդ, իսկ անվճար՝ 1898:
