«Հայաստանը TIMSS-2023 ստուգատեսում մաթեմատիկայից արձանագրել է 513 միավոր, բայց սա բավարար չէ հենց նախարարության սահմանած թիրախի առումով։ Կրթության զարգացման պետական ծրագրում 2030 թվականին, ըստ զարգացման ծրագրի, Հայաստանի մաթեմատիկայի ցուցանիշը պետք է լինի 550, իսկ մենք ունենք 513»։ mediaforedu.am-ի հետ զրույցում ասել է կրթության փորձագետ, ԵՊՀ դասախոս Սերոբ Խաչատրյանը:

Կրթության փորձագետը ուշադրություն է հրավիրում հանգամանքին, որ թեև TIMSS-2023 ստուգատեսում 4-րդ դասարանցիները առաջընթաց գրանցեցին մաթեմատիկայից, միևնույն ժամանակ գրանցեցին հետընթաց՝ բնագիտությունից։

«58 երկրների շարքում Հայաստանը մաթեմատիկայից 32-րդ տեղում է, իսկ բնագիտությունից՝ 45»,- նշել է Սերոբ Խաչատրյանը և հիշեցրել, որ հաջորդ ստուգատեսը լինելու է 2027 թվականին:

Ըստ Սերոբ Խաչատրյանի, «շատ ողբալի է բնագիտության վիճակը, քանի որ այս տարի ավելի բարձր շեմ է դրել նախարարությունը. մինչև 2030 թվականին մեր աշակերտները պետք է հասնեն 575 միավորի»։

Սերոբ Խաչատրյանի խոսքով, «Կրթության զարգացման ծրագիրը չկատարելու դեպքում խախտվում է օրենքը։

Բնագիտություն առարկա, որպես այդպիսին, չունենք, – ասում է Սերոբ Խաչատրյանը և հավելում. «Բնության մասին երեխաները սովորում են «Ես և շրջակա աշխարհը» առարկայից, որը ինտեգրված առարկա է: Այնտեղ կան ինչպես բնագիտական թեմաներ, այնպես էլ հասարակական թեմաներ։ Հիմնականում այս առարկան դասավանդում են դասվարները, որոնք բնագիտություն չգիտեն և սա խնդիր է»։

Մյուս խնդիրը, Սերոբ Խաչատրյանի խոսքով, այն է, որ մեր դասագրքերը հարմարացված չեն միջազգային ստուգատեսի պահանջներին, որովհետև փորձը ցույց է տալիս, որ որպեսզի երեխաները բարձր արդյունք ապահովեն, այն մարդիկ, որոնք գրում են դասագիրք, չափորոշիչ, պետք է հստակ իմանան, թե TIMSS-ի ժամանակ ինչ են հարցնում երեխաներին, ինչ տեսակի հարցեր են տալիս»։

Սերոբ Խաչատրյանը հույս է հայտնել, որ չափորոշչի փոխվելուց հետո, երբ 2027 թվականին Հայաստանի 4-րդ դասարանցիները մասնակցեն բնագիտության ստուգատեսին, կլինեն նոր չափորոշիչների և դասագրքերի արդյունքները:

Այդտեղ, ըստ կրթության փորձագետի, կարող ենք հուսալ, որ գուցե այս նոր չափորոշիչները և դասագրքերը կազմելիս հաշվի առել են TIMSS-ի պահանջները։