Շախմատը մեծ լսարանի համար

Ծաղկաձորում անցկացվող «Շախմատի կրթության տեսություն և պրակտիկա» միջազգային գիտաժողովում Եվրոպական շախմատի միության նախագահ, միջազգային գրոսմայստեր Զուրաբ Ազմայփարաշվիլին խոսեց շախմատի՝ նոր տեխնոլոգիաների պայմաններում ավելի լայն լսարանի համար հասանելի դառնալու մասին։

Գրոսմայստերի խոսքով՝ ժամանակակից տեխնոլոգիաները, այդ թվում՝ արհեստական բանականությունը, փոխում են շախմատի հասանելիությունը։ Եթե նախկինում շախմատի բարդությունը շատերի համար խոչընդոտ էր, ապա այսօր այդ խոչընդոտը նվազում է։

«Շատ մարդկանց անձամբ գիտեմ, որոնք սկսել են շախմատ սովորել և ասել են՝ դե լավ։ Նրանք սկսել են սովորել նաև այն պատճառով, որ տեսնում են, թե որքան առաջընթաց է գրանցվել։ Այսօր արդեն միլիոնավոր մարդիկ են շախմատ խաղում, հետաքրքրվում դրանով կամ շախմատի սիրահար են։ Ես լիովին հավատում եմ, որ մի քանի տարի անց մենք կհասնենք միլիարդի։ Սա նոր իրականություն է»,– ասաց Ազմայփարաշվիլին։

Զուրաբ Ազմայփարաշվիլին դպրոցում շախմատի զարգացումը պայմանավորեց շատ մեծ լսարանի հետ աշխատելով։ Այս համատեքստում նա կարևորեց շախմատի ուսուցչի դերի ճիշտ ընկալումը։

Ազմայփարաշվիլին ընդգծեց, որ շախմատի ուսուցիչը պարտադիր չէ, որ լինի բարձրակարգ շախմատիստ։

Գրոսմայստերի խոսքով՝ հանրակրթության մեջ շախմատի նպատակը բոլոր երեխաներին պրոֆեսիոնալ շախմատիստներ դարձնելը չէ։ Եթե երեխան ցանկանում է շախմատային կարիերա շարունակել, այդ նպատակով գործում են շախմատային ակումբներ, ֆեդերացիաներ և մասնագիտացված կառույցներ։