Այսօր Հայաստանում սկսվել է արհեստագործական և միջին մասնագիտական կրթական ծրագրեր իրականացնող հաստատությունների 2025-2026 ուսումնական տարվա ընդունելության հայտագրումը: Ոլորտային մասնագիտությունների համար ընդունելության դիմումներ ներկայացնելու վերջնաժամկետը օգոստոսի 8-ն է։ Քննությունները նշանակված են օգոստոսի 9-17-ը ներառյալ: Ոչ ոլորտային մասնագիտություններով դիմումները կընդունվեն մինչև 2025 թվականի օգոստոսի 17-ը։ Այս տեղեկությունն այսօր «Արմենպրես»-ի մամուլի սրահում հայտնեց ԿԳՄՍ փոխնախարար Արաքսիա Սվաջյանը։

Սվաջյանը հայտարարեց, որ այս տարի 150-ից ավելի մասնագիտությունների գծով ընդունելություն է իրականացվելու։ ՄԿՈՒ հաստատություններ դիմելու համար անհրաժեշտ է հայտագրվել կրթության կառավարման տեղեկատվական համակարգում՝ dimord.emis.am կայքում: Համակարգում ներկայացված են ՀՀ բոլոր արհեստագործական և միջին մասնագիտական կրթական ծրագրեր իրականացնող ուսումնական հաստատությունները։

«Ոչ ոլորտային մասնագիտությունների գծով հաշվի են առնում հիմնական կամ միջնակարգ կրթության ավարտական վկայականի միջին գնահատականները, որին գումարվում է տվյալ մասնագիտության համար առանձնացված առարկաներից ստացած միավորները։ Ինչ վերաբերում է ոլորտային մասնագիտություններին, ապա հաշվի են առնվում ավարտական վկայականի գնահատականների միջին ցուցանիշն ու քննական առարկայից ստացած արդյունքները և կազմակերպվում է մրցութային գործընթացը»,-պարզաբանեց Արաքսիա Սվաջյանը։

Ըստ փոխնախարարի, նկատվում է միջին մասնագիտական կրթության նկատմամբ հետաքրքրության աճ։ 2024-ին եղել է 15 հազար ընդունվող, որը 11 տոկոսվ ավելի է եղել նախորդող տարվա համեմատ։ Այս տարի ևս ակնկալվում է ընդունվողների բարձր ցուցանիշ։

Փոխնախարարն ասաց, որ երբեմն սովորողները հենց միջին մասնագիտական կրթական հաստատություններից են ընդունվում բուհեր։