Իռլանդիայի կրթության և երիտասարդության նախարարությունը հայտարարել է հատուկ կարիքներ ունեցող երեխաների կրթության նոր՝ հիբրիդային մոտեցման մասին։ Նախատեսվում է եկող սեպտեմբերից 5 ավագ դպրոցում 40 նոր՝ «ներառական հատուկ դասարաններ» բացել՝ այդ թիվը հասցնելով 427 – ի։

Մոդելը, ըստ նախարարության, համադրում է հատուկ և հիմնական կրթության տարրերը։ Աշակերտներիը որոշ դասաժամեր կանցկացնեն ընդհանուր դասարաններում, իսկ օրվա ընթացքում լրացուցիչ աջակցություն կստանան հատուկ դասարանում։

Նախարարությունն այս նախաձեռնությունը ներկայացրել է որպես «նոր մոտեցում», որն, ըստ պաշտոնական հաղորդագրության, հիմնված է որոշ դպրոցներում կիրառվող հաջող փորձի վրա և հնարավորություն է տալիս համատեղել ներառական ուսուցումն ու մասնագիտացված աջակցությունը։

Հատուկ մասնագետների հարցը

Նախարարությունն ընդգծել է, որ այսպիսով կբավարարվի ամբողջ երկրի դպրոցների պահանջարկը՝ ավելի ճկուն և ներառական ձևերով հնարավոր կլինի աջակցել հատուկ կարիքներ ունեցող աշակերտներին։ Նախատեսվում է 1 կամ 2 ուսուցչի հաստիք՝ ավագ դպրոցում, ինչպես նաև ուսուցչի 2 օգնականի աջակցություն՝ յուրաքանչյուր ներառական հատուկ դասարանում։

Դպրոցները կահավորման և սարքավորումների համար կստանան 30 000 եվրո դրամաշնորհ, անհրաժեշտության դեպքում՝ շենքային թեթև նորոգումների և հարմարեցումների համար ֆինանսավորում։

Կրթության նախարար Հիլդեգարդ Նաուգթոնը հայտարարել է, որ այս քայլը «ևս մեկ կարևոր առաջընթաց է՝ ապահովելու, որ յուրաքանչյուր երեխա ստանա իր կարիքներին համապատասխան կրթություն»։

Աուտիզմի ոլորտում գործող AsIAm բարեգործական կազմակերպությունը նշել է, որ մտահոգված է այն աշակերտների համար, որոնք դեռ չունեն դպրոցական տեղ։

«Թեև նման բարեփոխումները կարող են նպաստել ավելի ներառական համակարգի ձևավորմանը, դրանք չպետք է անտեսեն ոչ միայն դպրոցական տեղ ունենալու, այլև համապատասխան կրթական միջավայրում սովորելու իրավունքը», — նշվում է մասնագիտացված կազմակերպության հայտարարության մեջ։

Կազմակերպությունը նաև ընդգծել է, որ «ներառական» տերմինի կիրառումը պետք է հստակեցվի․ աուտիզմի խնդրին պատրաստ դասարանները պետք է ապահովեն ներառականություն և մասնակցություն հիմնական կրթական գործընթացներին։

Պարզաբանումների կարիք

Կազմակերպությունը մտահոգվել է, որ նախաձեռնությունը ներկայացվել է առանց բավարար նախնական խորհրդակցության և կոչ է արել շտապ պարզաբանումներ տրամադրել։

Որոշ դպրոցների ղեկավարներ դժգոհել են, որ թեև ավելի շատ երեխաների ընդունելու ցանկություն կա, ֆիզիկական տարածքի սահմանափակ լինելը թույլ չի տալիս բացել լրացուցիչ դասարաններ։