Լուսանկարը՝ Հայաստանի ազգային գրադարանի կայքից
ՀՀ կրթության, գիտության, մշակույթի և սպորտի նախարարի տեղակալ Ալֆրեդ Քոչարյանը պատգամավորների քննարկմանն է ներկայացրել «Գրադարանների և գրադարանային գործի մասին» օրենքում լրացումներ և փոփոխություններ նախատեսող օրինագիծը:
Փոխնախարարի խոսքով, առաջին ընթերցումից հետո նախագծի վերաբերյալ խորհրդարանում տեղի ունեցած քննարկման արդյունքում լավարկվել են գրադարանային աշխատողին, նրա իրավունքներին ու պարտականություններին վերաբերող դրույթները:
Նախագծի ընդունմամբ կսահմանվեն էլեկտրոնային գրադարան և մշակութային, կրթական, տեղեկատվական կենտրոն` լոֆթ, հասկացությունները, օրենքով կամրագրվի արտերկրի կարևոր հայագիտական ֆոնդի համալրման պահանջը, կհստակեցվեն գրադարանների օգտագործման նպատակները:
Օրենքի փոփոխությունը թույլ է տալիս, որ գրադարաններն օգտագործվեն ոչ միայն բուն նշանակությամբ, այլև զբոսաշրջային նպատակներով:
Օրենքի փոփոխություններով առաջարկվում է նաև թույլատրել հուշանվերների պատրաստումը և վաճառքը, կրթական ծրագրերի իրականացումը, գրքերի, պարբերականների հրատարակումն ու իրացումը, նկարահանումների, հեռուստատեսային ծրագրերի պատրաստումը, առևտրային ցուցահանդեսների կազմակերպումը, սրճարանային գործունեությունը, որոշակի ժամանակահատվածում գրադարանի գույքից օգտվելու իրավունքի տրամադրումը:
Գրադարանի տարածքի օգտագործումը տնտեսական նպատակներով կթույլատրվի պետական մարմնի համաձայնությամբ:
