Այսօր Երևանի և մարզերի մի շարք դպրոցներում առաջին անգամ անցկացվել է ընթերցանության օլիմպիադա «Մայրենի» առարկայի շրջանակում։ Տեղեկացնում է ՀՀ ԿԳՄՍ նախարարությունը:

Ըստ հաղորդագրության, «Մայրենի» առարկայի օլիմպիադան անցկացվում է երկու՝ դպրոցական և մարզային փուլերով՝ տեքստի լուռ ընթերցանության և վերարտադրության ձևաչափով։

Օլիմպիադայի դպրոցական առաջին փուլին մասնակցել է 5-րդ և 6-րդ դասարանների 8687 աշակերտ: Մարզային փուլին մասնակցել է 632 աշակերտ։

Առաջադրանքները գնահատվում են 100 միավորանոց սանդղակով (յուրաքանչյուր հարցի պատասխան առավելագույնը գնահատվում է 5 միավոր): Սխալ պատասխանի համար միավոր չի տրվում, ուղղագրական և կետադրական յուրաքանչյուր սխալի համար հանվում է 0,5 միավոր։

Առավելագույն միավորը տրվում է, եթե աշակերտը ներկայացնում է տրամաբանված, հարուստ բառապաշարով պատասխան՝ հարազատ մնալով գրվածքի բովանդակությանը՝ կատարելով բառերի ճիշտ ընտրություն, նախադասությունների համոզիչ ձևակերպում, օգտագործելով ինքնատիպ բառապաշար։

Անդրադառնալով օլիմպիադաների անցկացման կարգի վերանայմանը՝ նոր չափորոշչի ներդրման համատեքստում, փոխնախար Սվաջյանը նշել է՝ տվյալ պարագայում հաշվի է առնվել, որ նոր չափորոշիչն արդեն ներդրված է դպրոցների 7 դասարաններում։

Օլիմպիադայի դպրոցական փուլի մասնակիցների կատարած աշխատանքներն, ըստ պաշտոնական հաղորդագրության, ստուգել են դպրոցի տնօրենի հրամանով «Մայրենի» և «Հայոց լեզու և գրականություն» առարկաների ուսուցիչներից ձևավորված հանձնաժողովները։

Հիշեցնենք, որ ՀՀ-ում օլիմպիադաների ացկացման համար պետական բյուջեով նախատեսված է ֆինանսական հատկացում: Մասնավորապես, 2025թ․-ի պետական բյուջեով «Դպրոցականների օլիմպիադաների անցկացում» միջոցառմանը հատկացվել է 71 մլն դրամ։