Լուսանկարը՝ ՄՀԿ-ի
Սյունիքի մարզի սահմանամերձ Ծավ գյուղում երեկ տեղի ունեցած հանրային քննարկման ժամանակ հնչել է տեսակետ, թե որևէ իմաստ չունի քանդել կանգուն, ամուր շենքը և որ նոր կրթահամալիրը կարելի է կառուցել գյուղի այլ տարածքում:
Դպրոցի շենքը քանդելու վերաբերյալ հանրային լսումների ժամանակ անհամաձայնություն է հայտնել նաև Ծավ համայնքի ղեկավար Արմեն Ալեքսանյանը: Նա mediaforedu.am-ի հետ զրույցում վերահաստատեց իր պնդումը: Արմեն Ալեքսանյանն, ի դեպ, ասաց, որ ծանոթ չէ դպրոցի շենքը քանդելու հիմք հանդիսացող գրավոր փաստաթղթերին: Դրանք ներկայացվել են Կապանի համայնքապետարան:
Ըստ նախագծի, Ծավում պետք է կառուցվի կրթահամալիր 144 աշակերտի համար և մանկապարտեզ 40 սանի համար:
Կրթահամալիրի կառուցման պարտավորություն ստանձնել է «ՄԱԲՆԱ ԲԵՀԻՆԵՀ ՍԱԶԱՆ ՆԻՐՈՒ» ՓԲԸ-ն, որի տնօրեն Ջավադ Սաիդիի հրավերով 2024 թ. սեպտեմբերի 30-ին Կապանի մշակութային տանը տեղի է ունեցել հանրային քննարկում: Արձանագրությունը հրապարակված է Կապանի համայնքապետարանի կայքում: Առաջին հանրային քննարկման վերաբերյալ, ի դեպ, Ծավի բնակիչները տեղեկացված չեն եղել:
Ծավում նոր կրթահամալիրի կառուցումը նախատեսվում է «Մինչև 2026 թվականը կառուցվող, հիմնանորոգվող կամ վերակառուցվող 300 դպրոցների» ծրագրի շրջանակում:
Այս ծրագրի հիմքում ՀՀ կառավարության 2023 թ դեկտեմբերի 2-ին հրապարակված ՀՀ կառավարության որոշումն է:
Դպրոցների ապահովությանը և սեյսմիկ անվտագության մակարդակի բարձացմանն ուղղված ծրագրերը 2021-2023 թթ․-ի կտրվածքով համապատասխանաբար 2% և 4%-ով աճել են՝ հասնելով 4% և 6%-ի: Սակայն 2024 թ․ ցուցանիշը նվազել է՝ հասնելով 1%-ի: Իսկ սեյսմիկ անվտագության մակարդակի բարձացմանն ուղղված ծրագրի ցուցանիշը աճել է՝ հասնելով 6%-ի։ 2024 թ․-ի ցանկում է նաև հանրակրթական, նախադպրոցական հաստատությունների հիմնման, կառուցման, բարելավման ծրագիրը՝ 5% աճով։
Թե պետբյուջեից հատկացված գումարը որքանով է արդյունավետ օգտագործվում հատկապես առերևույթ բարեկարգ դպրոցի շենքը հիմնահատակ քանդելու և տեղում նորը կառուցելու դեպքում, կփորձենք պարզել առաջիկայում:
