Նոր Զելանդիայի առաջնահերթությունները՝ PISA-ից հետո

Նոր Զելանդիայի կառավարությունը դպրոցներից պահանջում է ռազմավարական ծրագրերում առաջնահերթություն տալ հիմնական կրթական արդյունքներին
Ռազմավարական պլանավորման կանոնները փոխվում են․ դպրոցների խորհուրդներն այսուհետ պարտավոր են իրենց ծրագրերում ներառել աշակերտների կրթական առաջադիմությանը վերաբերող առնվազն մեկ նպատակ՝ ընթերցանության, գրավոր խոսքի կամ մաթեմատիկայի ոլորտում։

Փոփոխությունը տեղի է ունենում այն համատեքստում, երբ երկրում շարունակվում են քննարկումները կրթական արդյունքների երկարաժամկետ անկման վերաբերյալ։ ՏՀԶԿ-ի PISA 2022 գնահատման համաձայն՝ Նոր Զելանդիայի 15-ամյա աշակերտները մաթեմատիկայի, ընթերցանության և բնագիտության ոլորտներում դեռևս գերազանցում էին ՏՀԶԿ երկրների միջին ցուցանիշները։ Սակայն նախորդ տարիների համեմատ արձանագրվել է առաջադիմության զգալի նվազում, հատկապես մաթեմատիկայում։ 2012–2022 թվականներին հիմնական հմտությունների նվազագույն մակարդակին չհասած աշակերտների մասնաբաժինը մաթեմատիկայում աճել է 6, ընթերցանությունում՝ 4, իսկ բնագիտությունում՝ 4 տոկոսային կետով։

ՏՀԶԿ-ն արձանագրել է նաև, որ 2018–2022 թվականներին Նոր Զելանդիայի մաթեմատիկայի արդյունքները զգալիորեն վատացել են, իսկ ընթերցանության և բնագիտության ոլորտներում ևս նկատվում է ավելի երկարաժամկետ բացասական միտում։ Միաժամանակ, կազմակերպությունը նշել է, որ PISA 2022-ի տվյալները պետք է մեկնաբանել զգուշությամբ՝ ընտրանքի հետ կապված որոշ սահմանափակումների պատճառով։ Այնուամենայնիվ, կրթական առաջադիմության նվազումը հաստատվում է նաև այլ գնահատումներով։ Այնուհանդերձ, այս երկիրն իր տվյալներով առաջատար դիրքերում է ՏՀԶԿ վերջին գնահատումներով։

Առաջադիմություն

Նոր կանոններով դպրոցների խորհուրդները պետք է սահմանեն առնվազն երեք ռազմավարական նպատակ, որոնցից մեկը պարտադիր պետք է վերաբերի հիմնական առարկաներից որևէ մեկում աշակերտների առաջադիմությանը։ Դպրոցները, միաժամանակ, պահպանում են լրացուցիչ նպատակներ սահմանելու հնարավորությունը՝ դրանք մշակելով դպրոցական համայնքի հետ խորհրդակցությունների միջոցով։

Հաշվետվողականություն

Փոփոխությունների մյուս մասը վերաբերում է հաշվետվողականության ձևաչափին։ Դպրոցներն այլևս պարտավոր չեն լինի ռազմավարական ծրագրերում բացատրել, թե իրենց նպատակներն ինչպես են կապվում ազգային կրթական ռազմավարությունների հետ։ Սակայն այդ ռազմավարությունների օգտագործումը չի արգելվում, իսկ դպրոցների՝ տարբեր խմբերի աշակերտների կարիքները բացահայտելու և նրանց աջակցելու պարտավորությունները պահպանվում են։

Ժամկետը

Նոր ռազմավարական ծրագրերը պետք է գործեն 2027 թվականի հունվարի 1-ից և նախարարություն ներկայացվեն մինչև մարտի 1-ը։ Կրթության նախարարությունը նախատեսում է 2026 թվականի չորրորդ ուսումնական շրջանի սկզբին հրապարակել պլանավորման և հաշվետվողականության թարմացված ուղեցույցը։

Նախարարության պաշտոնական հաղորդագրության մեջ չի նշվում, որ կանոնակարգի փոփոխությունն ուղղակիորեն պայմանավորված է PISA-ի արդյունքներով։ Սակայն որոշումը տեղավորվում է այն ավելի լայն քաղաքական համատեքստում, որտեղ Նոր Զելանդիան փորձում է ուժեղացնել հիմնարար հմտությունների ուսուցման, աշակերտների առաջադիմության չափման և դպրոցների ռազմավարական պլանավորման միջև կապը։