Լուսանկարը՝ ՄՀԿ-ի
Այսօր Սյունիքի մարզի Ծավ գյուղում նախատեսվում է Ծավի կրթահամալիրի կառուցման շրջակա միջավայրի վրա ազդեցության հաշվետվության հանրային քննարկումների 2-րդ փուլը: Հայրտարարությունը գյուղապետարանի շենքին փակցվել է օրերս:
Ծավում նախատեսվում է կրթահամալիր կառուցել «Մինչև 2026 թվականը կառուցվող, հիմնանորոգվող կամ վերակառուցվող 300 դպրոցների» ծրագրի շրջանակում:
Գլխավոր թեման առերևույթ բարվոք դպրոցական շենքը հիմնահատակ քանդելու հավանականությունն է: Այս խնդիրը սրված է, հատկապես եթե նկատի ունենանք մի շարք այլ բնակավայրերում անհամեմատ վատ վիճակում գտնվող դպրոցների հանգամանքը:
Ծավի բնակիչների շրջանում կա տեսակետ, որ առավել նպատակահարմար կլինի ոչ թե քանդել գործունակ շենքը, այլ նոր կրթահամալիրը կառուցել գյուղի մեկ ուրիշ տարածքում:
Նախատեսվում է Ծավի կրթահամալիրում կազմակերպել նաև հարևան գյուղերի՝ Ներքին Հանդի, Սրաշենի, Շիկահողի երեխաների կրթությունը:
Կապան համայնքի պաշտոնական կայքում առկա տեղեկության համաձայն, հանրային քննարկման առաջին փուլը տեղի է ունեցել 2024 թ. սեպտեմբերի 30-ին Կապանում:
Ըստ արձանագրության, Ծավում 144 տեղանոց դպրոցի և 40 տեղով մանկապարտեզի կառուցողը «ՄԱԲՆԱ ԲԵՀԻՆԵՀ ՍԱԶԱՆ ՆԻՐՈՒ ՓԲԸ»-ն է, որի տնօրեն Ջավադ Սաիդիի հրավերով էլ եղել է հանրային քննարկումը:
«Քննարկմանը ներկա էին Հայաստանի տարածքային զարգացման հիմնադրամի սոցիոլոգ Մարի Ջավահիրյանը, «ԱՎ ԿՈՄՊԱՆԻ» ՍՊ ընկերության տնօրենը, ինչպես նաև Կապանի համայնքապետարանի աշխատակիցներ»,- նշված է հանրային 1-ին քննարկման արձանագրության մեջ:
Կապանի մշակութային կենտրոնում տեղի ունեցած 1-ին հանրային քննարկման ժամանակ, ըստ արձանագրության, «ԱՎ ԿՈՄՊԱՆԻ» ՍՊ ընկերության տնօրեն Արսեն Քլշյանն ասել է. «Ծավ համայնքում գոյություն ունեցող դպրոցի նույն տեղում նախատեսվում է կառուցել 144 տեղ/հզորությամբ միջնակարգ դպրոց և 40 տեղ/հզորությամբ մանկապարտեզ»:
Արձանագրության տեքստում նշված է, որ դպրոցը հագեցած է լինելու կահույքով և կահավորված հանձնվելու է: «Այս պահին կատարում ենք տարածքի ուսումնասիրություն ու տիպային նախագծի տեղակապման աշխատանքներ: Գյուղում կոյուղի չկա այդ պատճառով նախատեսվում է կառուցել մաքրման կայան, որպեսզի կեղտաջրերը մաքրվեն և 95 տոկոս մաքուր ջուր է դուրս գալու, որը գնալու է առվակ: Այս փուլում կարող ենք այսքան ինֆորմացիա տալ, մինչև նախագծային աշխատանքները վերջացնենք, 2-րդ փուլում ավելի մանրամասն կներկայացնենք: Նաև դպրոցում լինելու է ապաստարան՝ նկուղային հարկով»,- ասել է Արսեն Քլշյանը:
