Ներառականությունը ուսուցչի պարտադիր ատեստավորման առանձին կրեդիտ է: Սա պաշտոնական հայտարարություն է, որը հնչել է ՀՀ ԿԳՄՍ նախարարությունում: Ըստ ԿԳՄՍ նախարարության, յուրաքանչյուր ուսուցիչ 5 տարին մեկ պարտադիր ատեստավորում է անցնում. տարեկան վերապատրաստվում և ատեստավորվում է մոտ 7000 ուսուցիչ:

Այս պաշտոնական պնդումներին զուգահեռ ՀՀ կրթության տեսչական մարմինը մասնավորապես 2024 թվականի տարեկան հաշվետվության մեջ նշում է.

«Զարգացման ենթակա գործառույթները հիմնականում վերաբերում են կրթության առանձնահատուկ պայմանների կարիք ունեցող սովորողների ուսուցման գործընթացի կազմակերպման համար ֆիզիկական միջավայրի ապահովմանը։

Դպրոցներն հիմնականում ապահովված չեն՝

«Բյուջեներ քաղաքացիների համար» ծրագրով «Մեդիան հանուն կրթության» ՀԿ հետ համագործակցող երիտասարդ տնտեսագետ Էլենա Հարությունյանն ուսումնասիրել է, թե երբ և ինչ ֆինանսական միջոցներ են հատկացվել հատուկ կարիք ունեցողների կրթության կազմակերպման նպատակով:

Ստորև՝ տնտեսագետի պարզած տվյալները՝ հատուկ կարիքի ուղղությամբ կատարված ծախսերի վերաբերյալ:

2016 թվականից ՀՀ կրթության, գիտության, մշակույթի և սպորտի նախարարությունը ԱՄՆ Միջազգային զարգացման գործակալության աջակցությամբ իրականացրել է «Ներառական կրթության համակարգի ներդրում» դրամաշնորհային ծրագիրը։ Նպատան է եղել ապահովել բոլոր երեխաների հավասար կրթության հնարավորությունը՝ հարմարեցնելով դպրոցների միջավայրը ներառական կրթության պահանջներին։

Ծրագրի շրջանակում 2019-2020 թթ. իրականացվել են շենքային պայմանների հարմարեցման աշխատանքներ ՀՀ Սյունիքի մարզի 9 դպրոցի և 1 տարածքային մանկավարժահոգեբանական կենտրոնի (ՏՄԱԿ) համար։ Այդ նպատակով ըստ պետական բյուջեի հավալվածների 2020 թվականին հատկացվել է 17,2 մլն դրամ։

2021 թվականին ծրագիրը ընդգրկել է 34 դպրոց և 2 ՏՄԱԿ, որոնց համար տրամադրվել է 9,5 մլն դրամ։ 2022 թվականին շինարարական և հարմարեցման աշխատանքներ են իրականացվել ՀՀ Լոռու մարզի 14 դպրոցի և 1 ՏՄԱԿ-ի, ինչպես նաև Շիրակի մարզի 4 դպրոցի և 1 ՏՄԱԿ-ի շենքերում։ Նշված աշխատանքների համար հատկացվել է 64,1 մլն դրամ։ 2023 թվականին ավարտվել են 12 դպրոցի և 1 ՏՄԱԿ-ի շենքային հարմարեցման աշխատանքները՝ 13,9 մլն դրամ բյուջետային հատկացմամբ։

Բացի շենքային բարելավումներից, ԱՄՆ ՄԶԳ ծրագրի միջոցով վերանորոգված դպրոցներն ապահովվել են համապատասխան գույքով՝ սեղաններով, գրապահարաններով և ներառական կրթական միջավայրի համար անհրաժեշտ այլ միջոցներով։