Լուսանկարը` D/F-ի
Աշխարհում տարեկան մոտ 1.2 միլիարդ երեխա տանը և դպրոցում ենթարկվում է ֆիզիկական պատժի։ Այս տվյալները ներառող զեկույց է հրապարակել Առողջապահության համաշխարհային կազմակերպությունը (ԱՀԿ)՝ ընդգծելով նման գործելակերպի վտանգավորությունը։
ԱՀԿ-ն վկայակոչում է գիտական ուսումնասիրություններ, որոնք ցույց են տալիս, որ ֆիզիկական պատիժը չի կարող նպաստել դաստիարակությանը․ այն վնասում է երեխաների ֆիզիկական և հոգեկան առողջությանը, խաթարում է կրթական առաջընթացը և մեծացնում է ագրեսիվ վարքագծի հավանականությունը։ Նույնիսկ «թեթև» կամ «անվնաս» համարվող պատիժը կարող է վերաճել դաժան վերաբերմունքի։
ԱՀԿ-ն շեշտում է, որ ֆիզիկական պատիժը խախտում է երեխաների հիմնարար իրավունքները՝ արժանապատվության, առողջության և կրթության։ Կազմակերպությունը կառավարություններին կոչ է անում ուժեղացնել օրենսդրական արգելքները, աջակցել ծնողներին ոչ բռնի դաստիարակության մեթոդներով և դպրոցներում ապահովել խաղաղ միջավայր։
ՄԱԿ-ի Երեխայի իրավունքների կոնվենցիայի իրականացման վերահսկողությամբ զբաղվող Երեխայի իրավունքների կոմիտեն «ֆիզիկական պատիժ» է որակում «ցանկացած պատիժ, որի դեպքում կիրառվում է ֆիզիկական ուժ և որի նպատակն է առաջացնել որոշակի չափի ցավ կամ անհարմարություն, նույնիսկ եթե այն թեթև է»։
Կոմիտեի համաձայն՝ ֆիզիկական պատիժը հիմնականում ներառում է երեխաներին հարվածելը ձեռքով կամ որևէ առարկայով, նաև՝ երեխաներին ոտքով հարվածելով, ցնցելով կամ նետելով, քերծելով, ճզմելով, մազերը քաշելով կամ հարվածելով, երեխաներին ստիպելով մնալ անհարմար դիրքերում, տաք ջրով վնասելով, ինչպես նաև ստիպողական կերակրելով։
«Երեխաների նկատմամբ բռնությունը թողնում է անդառնալի հետևանքներ։ Դրա վերացումը կարևոր է հասարակության առողջ ապագայի համար», – ընդգծում է ԱՀԿ-ն։
