Լուսանկարները՝ ՄՀԿ-ի
Որակյալ կրթության ապահովման ուղղությամբ պետբյուջեից կրթության ոլորտին հատկացվող միջոցների ու վերջնարդյունքների չափման միավորները հատուկ քննարկման են արժանի:
Անվճար և որակյալ հանրակրթության ապահովման նպատակով 2025 թ. պետական բյուջեից հատկացվող ֆինանսական միջոցները տրամադրվում են՝ ակնկալելով վերջնարդյունք. մտավոր, հոգևոր, ֆիզիկական և սոցիալական ունակությունների համակողմանի ու ներդաշնակ զարգացմամբ, հայրենասիրության, պետականության, մարդասիրության ոգով դաստիարակված, պատշաճ վարքով անձի ձևավորում:
Տնտեսական զարգացման և հետազոտությունների կենտրոնի գործադիր տնօրեն Կարինե Հարությունյանը այսօր հրավիրված աշխատաժողովի ժամանակ նկատեց, որ որպես չափման միավոր նշվում է երեխաների՝ նվազագույն մակարդակի գիտելիքները՝ ընթերցանությունից և մաթեմատիկայից. «Բայց, ճիշտն ասած, արդյունքային ցուցանիշը մեկ թվով է ներկայացված: Հետևաբար խնդիր եմ տեսնում՝ սա մաթեմատիկայի՞ց է, թե՞ ընթերցանությունից: Գուցե միջին ցուցանիշն է բերված, բայց սա պետք է անպայման ճշգրտվի բյուջետային փաստաթղթում, կա՛մ չափորոշիչը փոխվի, կա՛մ՝ ինդիկատորները 2-ը դառնան: Ընթերցանությունն ու մաթեմատիկան 1 ցուցանիշով չարժե ներկայացնել»:
Կարինե Հարությունյանը տնտեսագիտական գիտությունների թեկնածու է, Հայաստանի պետական տնտեսագիտական համալսարանի ակտուառական և ֆինանսական մաթեմատիկայի ամբիոնի դասախոս: Հանրակրթության ոլորտին հատկացված ծախսերի անդրադարձի առիթը «Բյուջետային քննարկումներում քաղաքացիական հասարակության ներգրավման բարելավում` հանրակրթության ոլորտի ֆինանսավորման հարցերի շուրջ Ազգային ժողով – ՔՀԿ հատված երկխոսություն» թեմայով աշխատաժողովն էր:
