Ատեստավորման չպարզաբանված հարցեր

«Կամավոր ատեստավորման արդյունքների անհամաձայնության վերաբերյալ ատեստավորումը կազմակերպող մարմին է ներկայացվել շուրջ 1500 բողոք»,- նշված է ՀՀ ԿԳՄՍ նախարարության՝ www.mediaforedu.am-ին հասցեագրված պատասխանի մեջ:

Դեկտեմբերի 16-ին www.mediaforedu.am-ը դիմել էր նախարարություն՝ հիմք ընդունելով նույն՝ ԿԳՄՍ նախարարության՝ 11.11. 2024 թ. հայտարարությունն, ըստ որի՝ Գնահատման և թեստավորման կենտրոնի հոսանքազրկման պատճառով առաջացել է տեխնիկական խնդիր, որի հետևանքով կամավոր ատեստավորմանը մասնակցած ուսուցիչները չեն կարողացել ներկայացնել ատեստավորման արդյունքների բողոքարկման դիմում:

Պաշտոնական հաղորդագրության հաջորդ օրը՝ 12.11.2024 թ.-ին ԿԳՄՍ նախարարությանը գրությամբ խնդրել էինք պատասխանել հարցին, թե քանի՞ բողոք է ստացել և ի՞նչ ժամկետներում են նախատեսվում որոշումները:

ԿԳՄՍ նախարարությունը նոյեմբերի 18-ին գրել էր. «Կամավոր ատեստավորման գործընթացը մեկնարկել է 2024 թվականի նոյեմբերի 9-ին և տևելու է մինչև նոյեմբերի 24-ը ներառյալ, հետևաբար, գործընթացի վերաբերյալ ամբողջական տեղեկատվություն հնարավոր կլինի տրամադրել այն վերլուծելուց և ամփոփելուց հետո:

Միաժամանակ տեղեկացնում ենք, որ Հայաuտանի Հանրապետության կառավարության 2022 թվականի ապրիլի 28-ի N 596-Ն որոշմամբ հաստատված կարգի դրույթների համաձայն՝ ատեստավորման արդյունքի բողոքը քննելու նպատակով ատեստավորումը կազմակերպած կենտրոնի ղեկավարի հրամանով ստեղծվում է 5 անձից բաղկացած բողոքարկման հանձնաժողով, որը ձևավորվում է բողոքը մուտքագրվելուց հետո՝ 3 աշխատանքային օրվա ընթացքում: Հանձնաժողովն իր ուսումնասիրության արդյունքների մասին գրավոր եզրակացությունը հանձնաժողովի ձևավորումից հետո 3 աշխատանքային օրվա ընթացքում ներկայացնում է բողոքը ներկայացրած մասնակցին։

Բողոքի քննարկման արդյունքի մասին որոշումն ընդունվում է բաց քվեարկությամբ՝ ձայների պարզ մեծամասնությամբ»:

Երկրորդ փորձ

Քանի որ լրացել էր նախարարության նշած ժամկետը՝ կրկին դիմեցինք ինչպես ատեստավորման հոսանքազրկման պատճառով անհնար դարձած բողոքների, այնպես էլ ատեստավորման ժամանակ ի հայտ եկած (հայոց լեզվի) թեստի ոչ բոլոր հարցերի տեսանելիության վերաբերյալ պարզաբանում ստանալու նպատակով:

Նոր բողոք

ՀՀ վարչապետի ֆեյսբուքյան «Գնդակահարության պատ» նախաձեռնությանն արձագանքելով՝ Karine Zhamakochyan անուն-ազգանունով հանդես եկող օգտատերը գրել է, որ մասնակցել է կամավոր ատեստավորմանը, պատասխանել միայն 13 առաջադրանքի, հաջորդ առաջադրանքները չի տեսել, քանի որ էկրանի վրա նշում չի եղել, որ կան այլ հարցեր ևս: Քանի որ ՀՀ վարչապետին ուղղված հարցադրումից ակնհայտ է, որ ուսուցիչն անհրաժեշտ միավորները չի հավաքել տեխնիկական խոտանի պատճառով, ՀՀ ԿԳՄՍ նախարարությանը խնդրել էինք գրավոր պատասխանել, թե.

1. Նման բովանդակությամբ քանի՞ բողոք է ստացել, ի՞նչ քայլեր է ձեռնարկել:
2. Առաջին անգամ էլեկտրոնային տարբերակով անցկացված ատեստավորման արդյունքում չպատասխանած առաջադրանքներով քանի՞ աշխատանք է եղել, և պարզաբանվե՞լ է արդյոք պատճառը։
3. ՀՀ վարչապետի «Գնդակահարության պատ» նախաձեռնության շնորհիվ ի հայտ եկած՝ տվյալ ուսուցչի բարձրաձայնած խնդրի լուծման ուղղությամբ ՀՀ ԿԳՄՍ նախարարությունն ի՞նչ քայլեր է ձեռնարկել կամ ձեռնարկում ատեստավորման պատրաստակամություն հայտնած ուսուցիչների գիտելիքի ստուգման համար տեխնիկական շփոթություններից զերծ պայմաններ ապահովելու համար:

ԿԳՄՍ նախարարությունը դեկտեմբերի 20-ին պատասխանել է, թե էլեկտրոնային ատեստավորման թեստավորումն իրականացնում է Կրթական տեխնոլոգիաների ազգային կենտրոնը (ԿՏԱԿ): ԿՏԱԿ-ն, ըստ ԿԳՄՍ նախարարության, պարզաբանել է, թե համակարգը տեխնիկական կամ ծրագրային խնդիր չի ունեցել, եղել է վահանակ, որի միջոցով հնարավոր էր տեսնել բոլոր առաջադրանքները:

ԿԳՄՍ փոխնախարար Արաքսիա Սվաջյանի ստորագրությամբ նույն պաշտոնական պատասխանի մեջ նաև նշվում է՝ «հաշվի առնելով կամավոր ատեստավորման էլեկտրոնային եղանակով թեստավորում անցկացնելու հանգամանքը՝ հրապարակվել էր տեսաուղեցույց, որում նշված է եղել նաև առաջադրանքների քանակը՝ ատեստավորման դիմած ուսուցիչներին նախապես իրազեկելով այդ մասին»:

Քանի որ ատեստավորման ժամանակ բոլոր թեստերի վերաբերյալ պատշաճ չտեղեկացված ուսուցիչները շարունակում են պնդել, որ իրազեկված չեն եղել թեստի հարցերի քանակի վերաբերյալ, www.mediaforedu.am-ը կրկին գրավոր դիմել է ԿԳՄՍ նախարարությանը և ԿՏԱԿ-ին՝ խնդրելով տրամադրել հարցերի քանակի մասին հուշող տեսաուղերձի հղում(ներ)ը: Պատասխանն ակնկալվում է 5 աշխատանքային օրվա ընթացքում: