Քաբուլում կրթական կենտրոնի մոտ տեղի ունեցած պայթյունի հետևանքով վիրավորվել է առնվազն 42 երեխա։ ՄԱԿ-ի Աֆղանստանի աջակցության առաքելությունը հայտնել է, որ միջադեպը տեղի է ունեցել երկուշաբթի՝ Դաշտ-է-Բարչի թաղամասում՝ կոչ անելով սկսել հետաքննություն։ Հաղորդում է Reuters լրատվական գործակալությունը։

Տուժածներից առնվազն 35-ը բեկորային վնասվածքներով տեղափոխվել է հիվանդանոց։ Քաբուլի բուժհաստատության տվյալներով՝ բոլոր տուժածները 10-14 տարեկան են։ Առնվազն երեք երեխա վիրահատության կարիք է ունեցել։

Դաշտ-է-Բարչին Քաբուլի այն թաղամասերից է, որտեղ հիմնականում բնակվում են շիա ներկայացուցիչներ։ Տարածքը նախկինում բազմիցս դարձել է սուննի իսլամիստական զինված խմբավորումների, այդ թվում՝ «Իսլամական պետության», հարձակումների թիրախ։

Եվրամիության առաքելությունը X հարթակում հայտարարել է. «Դպրոցները պետք է անվտանգ լինեն․ երեխաների և կրթական կենտրոնների նկատմամբ կանխամտածված հարձակումներն անընդունելի են»։